एजेन्सी – स्पेनिस ला लिगा अन्तर्गत आइतबार हुने खेलमा बार्सिलोनाले रियल बेटिसको सामना गर्दैछ । लिगको डिफेन्डीङ च्याम्पियन समेत रहेको बार्सिलोनासँग यस खेलका लागि कप्तान लिओनेल मेस्सी र अर्का फरवार्ड लुइस सुआरेज भने उपलब्ध हुने छैनन् ।

मेस्सी प्रि-सिजनको प्रशिक्षणमा फर्केको पहिलो दिन नै घाइते भएपछि त्यसयता विश्राममा छन् । बेटिसविरुद्ध खेल्ने १८ सदस्यीय टोलीमा मेस्सीको नाम समावेश गरिएको छैन । मेस्सी हाल चोटका कारण एक्लै प्रशिक्षण गरिरहेका छन् । प्रशिक्षक भालभेर्डेले उनको फिटनेसलाई लिएर कुनै किसिमको जोखिम नलिने र शत प्रतिशत खेल्ने अवस्था भएपछि मात्र मैदानमा उतार्ने प्रष्ट पारेका छन् । मेस्सीले अर्को साताबाट पूर्ण प्रशिक्षणमा सहभागी हुने अपेक्षा गरिएको छ ।

मेस्सीसँगै सुआरेजको चोटले बार्सिलोनाको आक्रमण केहि फितलो हुने अनुमान गरिएको छ । ओस्मान डेम्बेले पनि शत प्रतिशत फिट नहुनुले बार्सिलोनामाथि थप समस्या आएको छ । राफिन्हाले आक्रमणमा खेल्न सक्ने हुनाले ग्रिजमन र उनीसँगै कार्लेस पेरेजले बार्सिलोनाको आक्रमण सम्हाल्ने प्रबल सम्भावना छ ।

यसै सिजन क्लब भित्रिएका ग्रिजमनलाई आफ्नो स्तर सिद्ध पार्ने यो उत्कृष्ट अवसर हो । मुख्य फरवार्डको रुपमा एटलेटिको म्याड्रिडमा आफूलाई स्थापित गरेका उनलाई नयाँ क्लबमा सुरुवातमै राम्रो अवसर मिलेको छ । उनले राम्रो प्रदर्शन गर्न सके सुआरेज र मेस्सीको चोट बार्सिलोनालाई महँगो पर्ने छैन ।