काठमाडौं (हाम्रो खेलकुद) – नेपाली यु–१६ राष्ट्रिय पुरुष फुटबल टोली एएफसी यू–१६ च्याम्पियनसिपको छनोट खेल्न जोर्डन जाने भएको छ ।

बिहीबार बिहान जोर्डन जाने २३ खेलाडीसहित ३१ सदस्यीय नेपाली टोलीलाई युवा तथा खेलकुद मन्त्री जगत बहादुर विश्वकर्मा, अखिल नेपाल फुटबल संघ (एन्फा) का अध्यक्ष कर्मा छिरिङ शेर्पालगायत एन्फा पदाधिकारीले विदाई गरे । सन् २०२० मा आयोजना हुने च्याम्पियनसिपको छनोटमा नेपाल समूह ‘ए’ मा रहेको छ । नेपालको समूहमा आयोजक जोर्डनसँगै कुवेत, ताजकिस्तान र श्रीलंका रहेका छन् ।

नेपालले २८ भदौमा घरेलु टोली जोर्डनसँग खेल्दै प्रतियोगिताको शुरुवात गर्नेछ । ३० भदौमा कुवेत, ३ असोजमा ताजकिस्तानसँग तथा ५ असोजमा श्रीलंकासँग खेल्ने तालिका छ । शीर्ष टोलीले दोस्रो चरणमा स्थान बनाउने छ । प्रतियोगिताको लागि मुख्य प्रशिक्षक सुनिल श्रेष्ठले भारतमा आयोजना भएको साफ यू–१५ उपविजेता टिमबाट ३ खेलाडी कप्तान प्रदिप लम्साल, गोलरक्षक ईश्वर गुरुङ र अशिम राईलाई उमेर बढी भएको कारण देखाउदै टिम बाहिर राखेका छन् ।

नेपाली टोली :

गोलरक्षक– मनोज दाहाल, जिनियस केसी र पाथुङ हाङ नेम्वाङ

डिफेन्डर –अजय चौधरी, अभिषेक वाईवा, जान लिम्बु, रोशन थापा, प्रज्ञान महर्जन, प्रमिश गुरुङ र आमिर हमिद

मिडफिल्डर – नितेश श्रेष्ठ, क्रिष्टल शाक्य, जन्मे जय धामी, विपिन तुम्सिङ मगर, मोहित गुरुङ, निराजन मल्ल, अनिल चौलागाई र निराजन खत्री

फरवार्ड – सशांक बोहरा, सुगम जिमी, कृष्ण अधिकारी यादव, कृष सापकोटा र दिपेश राई