एजेन्सी – पेरिस सेन्ट जर्मेन (पिएसजी) का सुपरस्टार नभएकै कारण रियल म्याड्रिडलाई हराउन सकेको प्रशिक्षक थोमस टुचेलले बताएका छन् । च्याम्पियन्स लिगको समूह चरण अन्तर्गतको पहिलो खेलमा बुधबार पिएसजीले रियललाई ३–० ले हराएको थियो ।

जसमा टोलीका स्टारत्रय नेयमार, केलियन एमबाप्पे र इन्डिन्सन काभानी खेलेका थिएनन् । नेयमार प्रतिबन्ध तथा काभानी र एमबाप्पे चोटका कारण खेलमा उपलब्ध हुन सकेनन् ।

सुपर स्टार त्रय नहुँदा टोलीका अन्य खेलाडीलाई राम्रो खेल्नु पर्ने दबाब परेको उल्लेख गर्दै प्रशिक्षक टुचेलले भने,’ हरेक खेलाडीलाई रियल विरुद्ध जित्नुपर्छ भन्ने भयो । त्यसमा माथि सुपर स्टारहरु नहुँदादबाब हरेक खेलाडीले लिए । मलाई लाग्छ काभानी, नेयमार र एमबाप्पले नहुनुले पनि टोलीलाई सहयोग पुग्यो । ‘

टोलीका कप्तान थिएगो सिल्भा अहिले च्याम्पियन्स लिग उपाधिका बारेमा सोच्ने बेला नभएको र आउने खेलमा पनि यसरी नै खेल्न आवश्यक रहेको औल्याएका छन् । ‘हामीले युरोपका अन्य टोलीलाई अहिले कुनै सन्देश दिइएका होइनन् । हो हामीले खेल नियन्त्रणमा राख्यौं । तयारी राम्रो थियो, त्यहि अनुसार प्रदर्शन पनि गर्न सक्यौं,’ सिल्भाले भने, ‘हामीले यो प्रदर्शनलाई लिगमा पनि जारी राख्न सक्नुपर्दछ । हरेकले आफ्नो क्षमता र प्रतिबद्धतालाई आउने दिनमा पनि देखाउनुपर्दछ ।’