एजेन्सी – बर्नाडो सिल्भाले ह्याट्रिक पुरा गरेपछि डिफेन्डिङ च्याम्पियन म्यानचेस्टर सिटीले इंग्लिस प्रिमियर लिगमा वाटफोर्डमाथि फराकिलो जित निकालेको छ । सिटीले घरेलु मैदानमा वाटफोर्डलाई ८–० को भारी अन्तरले पराजित गरेको हो ।

सिटीको फराकिलो जितमा सिल्भासँगै ६ खेलाडीले गोल गरे । सिल्भाले ह्याट्रिक पुरा गर्दा कप्तान डेभिड सिल्भा, सर्जियो अगुइरो, रियाद महारेज, निकोलस ओटामेन्डी र केभिन डि ब्रुयनले समान १–१ गोल गरे ।

एकपक्षीय र गोलको वर्षा भएको खेलमा सिटीले शुरुवाती १८ मिनेटभित्र नै ५ गोलको आरामदायी अग्रता लिएको थियो । दोस्रो हाफमा ३ गोल थपेको थियो ।

खेलको पहिलो मिनेटमा नै कप्तान सिल्भाले केभिन डि ब्रुयनको पासमा गोल गर्दै सिटीलाई अग्रता दिलाएका थिए । सातौ मिनेटमा सर्जियो अगुइरोले पेनालटीमा गोल गर्दै अग्रता दोब्बर बनायो । १२औं मिनेटमा रिया महारेजले गोल गरे । १५औं मिनेटमा बर्नाडो सिल्भाले तथा १८औं मिनेटमा निकोलस ओटामेन्डीले गोल गरेपछि सिटीले १८ मिनेट भित्रै ५–० को आरामदायी अग्रता लिएको थियो ।

दोस्रो हाफको शुरुमै सिल्भाले व्यक्तिग दोस्रो गोल गरे । ६० औं मिनेटमा सिल्भाले ह्याट्रिक पुरा गर्दा सिटी खेलमा ७–० ले अघि बढ्यो । ८५औं मिनेटमा केभिन डि ब्रुयनले गोल गर्दै सिटीलाई ८–० को फराकिलो जित दिलाए ।

जितसँगै सिटीले शीर्षस्थानमा रहेको लिभरपुलसँगको अंक दुरी ३ मा झारेको छ । सिटीको ६ खेलबाट १३ अंक रहँदा एक खेल कम खेलेको लिभरपुलको १५ अंक छ । पराजित वाटफोर्ड २ अंकसहित पुछारमा छ ।