एजेन्सी – सुपरस्टार फरवार्ड क्रिष्टियानो रोनाल्डोविनाको युभेन्टसले इटालियन सिरी ‘ए’ फुटबलमा कठिन जित निकालेको छ । युभेन्टसले ब्रेसियाकै मैदानमा २–१ को कठिन जित निकालेको हो ।

ब्रेसियामा मंगलबार राति भएको खेलमा युभेन्टसले एक गोलले पछि परेको स्थिति उल्ट्याएर जित हात पारेको हो । युभेन्टसको जितमा मिरालेम प्यानिचले गोल गरे । एक गोल उपहार पाएको थियो । घरेलु टोलीका अल्फ्रेडो डोनाररुम्माले गोल गरे ।

रोनाल्डो मांशपेशी चोटका कारण ब्रेसियाविरुद्धको खेलमा उपस्थित रहेनन् । खेलको चौथो मिनेटमा नै अल्फ्रेडोले गोल गर्दै घरेलु टोलीलाई सुरुवाती अग्रता दिलाएका थिए । ४०औं मिनेटमा जोन चान्सेलरले आत्मघाती गोल गरेपछि युभेन्टस खेलमा फर्किएको थियो ।

६३औं मिनेटमा मिरालेम प्यानिचले गोल गरेपछि युभेन्टस खेलमा अघि बढेको थियो । त्यसपछि थप गोल निस्कन नसक्दा युभेन्टस २–१ ले विजयी हुन सफल भयो । यसै खेलबाट सिरी ‘ए’ मा खेलेका मारिया बालाटेली युभेन्टसविरुद्ध मैदान उत्रिएपनि गोल गर्न सकेनन् । बालाटेली चार खेलको प्रतिबन्धपछि खेलमा फर्किएका थिए ।

जितसँगै युभेन्टस ५ खेलबाट १३ अंक जोडेर शीर्षस्थानमा उक्लिएको छ । युभेन्टसले एक खेल कम खेलेको इन्टर मिलानलाई एक अंकले पछि पारेको हो । पराजित ब्रेसिया ६ अंकसहति १२औं स्थानमा छ ।