एजेन्सी – जापानी लेजेन्ड केइसुके होन्डाले इंग्लिस क्लब म्यानचेस्टर युनाइटेडबाट खेल्ने इच्छा व्यक्त गरेका छन् । होन्डाले सामाजिक संजाल ट्वीटरको माध्यमबाट म्यानचेस्टर युनाइटेडको आधिकारि ट्वीटर ह्यान्डलमा एक ट्वीट पठाएर खेल्ने इच्छा व्यक्त गरेका हुन् ।

३३ वर्षीय होन्डाले त्यहाँ (युनाइटेड) मा करारमा राख्दै एक मौका दिन अनुरोध गर्दै विना पारिश्रमिक पनि खेल्न तयार रहेको संकेत दिएका छन् । ‘मलाई एउटा प्रस्ताव दिनुहोस् । मलाई पैसा चाहिदैन । तर, मलाई ठुलो र महान टिमबाट स्टार खेलाडीहरुसँग जोडिदै खेल्ने इच्छा छ ।’ उनले ट्वीट गरेका छन् ।

चोटले पिरोलेको युनाइटेड अग्रपङ्तिका खेलाडीको खोजीमा रहेपनि होन्डाको यो प्रस्ताव असम्भव जस्तै छ । एन्थोनी मार्सियल, मार्कस रासफोर्ड र पल पोग्बा अहिले घाइते भएका छन् । रोमलु लुकाकु इन्टरमा र एलेक्सिस सान्चेजले लोनमा क्लब छाडिसकेका छन् । उनीहरुको विकल्पमा प्रशिक्षक ओले गनर सोल्सजायरले युवा खेलाडी मेसन ग्रीनवुडलाई मौका दिइरहेका छन् । मेसनले एस्ताना र रोचदालेविरुद्ध गोल गर्दै आफुलाई प्रमाणित गरिसकेका छन् ।

होन्डाले इंग्ल्यान्डको कुनैपनि टोलीबाट खेलेका छैनन् । अधिकांश समय रसियन क्लब सिएसके मस्कोमा (२००९–२०१४) बिताएका होन्डाले इटालियन क्लब एसी मिलानबाट २०१४–०१७) खेलेका छन् । त्यसपछि एक सिजन होन्डाले मेक्सिकन क्लब पचुकामा बिताएका थिए । होन्डा गत जुलाईपछि क्लबविहीन छन् । उनी जुलाइसम्म एल लिग मेलवर्न भिक्टोरीमा रहेका थिए ।

होन्डाले सन् २०१८ मा अन्तर्राष्ट्रिय फुटबलबाट सन्न्यासको घोषणा गरिसकेका छन् । २००८ देखि सिनियर टोलीमा रहेका उनले जापानका लागि ९८ खेलमा ३७ गोल गरेका छन् ।