युभेन्ट्सको जितमा हिगुइनको गोल निर्णायक

एजेन्सी – गोन्जालो हिगुइनको निर्णायक गोलमा इटालियन सिरि एमा आइतबार राती युभेन्ट्सले इन्टर मिलानलाई २ –१ ले हराएको छ । जितपछि युभेन्ट्स शीर्षस्थानमा उक्लेको छ ।

पाउलो डिबालाको गोलमा चौथो मिनटमा साविक विजेता युभेन्ट्सले खेलमा अग्रता लिएको थियो । १८ औं मिनेटमा इन्टरले खेललाई बराबरीमा पुर्यो । लाउटोरो मार्टिनेजले पेनाल्टीमा प्राप्त अवसरलाई गोलमा परिणत गर्दै खेललाई बराबरीमा लगेका थिए ।

बराबरीतर्फ उन्मुख खेलको १० मिनेट बाँकी रहँदा परिवर्तित खेलाडीका रुपमा मैदान प्रवेश गरेका हिगुइनले गोल गरे र टोलीलाई महत्वपुर्ण जित दिलाए । युभेन्ट्सका सुपरस्टार क्रिस्टियानो रोनाल्डोले पनि पुरा समय खेलेका थिए ।

डिबालाले गोल गरेको ५ मिनेटपछि रोनाल्डोले गोलअन्तरलाई दोब्बर पार्ने मौका पाएका थिए। तर उनको प्रहार क्रसबारमा लाग्यो । पहिलो हाफको अन्त्यतिर रोनाल्डोले गोल गरेपनि रेफ्रीले त्यसलाई अफसाइड लिए । ७ खेलमा युभेन्ट्सको १९ अंक पुगेको छ । १८ अंकको इन्टर दोस्रो स्थानमा झरेको छ ।