काठमाडौं (हाम्रो खेलकुद)– फरवार्ड भरत खवास केहि अघि सम्म पनि नेपाली राष्ट्रिय फुटबल टोलीका नियमित सदस्य हुन् । नेपाली सेनाका लेफिटनेन्ट समेत रहेका भरत गत महिना थाइल्यान्डमा सैन्य तालिम सकेर फर्केका थिए ।
उनी थाइल्यान्डमा रहँदा नेपाली टोली भने विश्व कप छनोटको तयारीमा जुटेको थियो । उनी थाइल्यान्डमा रहँदा नेपाली टोलीले कुवेतसँग भदौ १९ गते ७–० को हार बेहोरेको थियो । भरत २० गते स्वदेश फर्केका थिए । नेपालले भदौ २४ गते भने चाइनिज ताइपेलाई २–० ले हराउँदा उनी स्वदेशमा थिए ।
लामो समयको विश्रामका कारण उनलाई प्रशिक्षक योहान कालिनले अष्ट्रेलियासँगको खेलका लागि बोलाएनन् । नेपालका लागि ५० भन्दा बढी खेल खेलिसकेका भरतले टोलीको कप्तान समेत गरिसकेका छन् ।
नेपाल र अष्ट्रेलियाबीच बिहीबार विश्व कप छनोटको खेल हुँदा भरत पनि समर्थकका रुपमा टेलिभिजन अघि बसे । एक दशक भन्दा लामो समयदेखि नेपाली टोलीको हिस्सा रहँदै आएका भरतले अष्ट्रेलियासँगको खेलमा आफ्नो अनुभव हाम्रो खेलकुद डटकमसँग साटेका छन् । उनकै शब्दमा
खेल्न भन्दा हेर्न निकै गाह्रो हुने रहेछ । मैदान भित्र हुँदा हामी खेलमा मात्र केन्द्रित हुन्छौं । समग्रमा कस्तो प्रदर्शन रह्यो भन्ने थाहा हुँदैन । आफ्नो तर्फबाट शतप्रतिशत दिने कोसिस गछौं । मेहनत गरिन्छ । हेर्दा निकै दबाब हुने रहेछ । आफु मैदानमा भएको भए यो गर्थे भन्ने लाग्ने रहेछ । डेड बलहरुमा गोल खालाकी भन्ने डर हुने रहेछ । बाहिरबाट हेर्दा सबैको खेल समग्रमा टोलीको खेल र विपक्षीको खेल देखिने भएकाले हेर्न निकै कठिन महसुस गरे । कर्नर फ्रिकिक हुँदा गोल खाइन्छकी लाग्ने । मन डराउने । चसक्क हुने रहेछ ।
हार जित खेलको अंश हो । हामी त सबै नतिजाका लागि तयार भएर नै मैदान जाने हो । सके सम्म राम्रो नतिजाका लागि कोशिस गर्ने हो । मलाई लाग्छ हामीले अष्ट्रेलियाविरुद्ध अझै राम्रो खेल्न सक्थ्यौं । यद्दपी अष्ट्रेलिया हामी भन्दा निकै माथिको टोली हो । खेलाडीले शतप्रतिशत दिएका हुन् । यो खेललाई हामीले सिक्ने मौकाका रुपमा लिनुपर्दछ । यस्तो मौका बारम्बार आउँदैन ।
यो खेलले आउने खेलका लागि हामीलाई सुधार गर्ने एउटा अवसरका रुपमा लिएका छौं । धेरैको अनुमान थियो हामीले अष्ट्रेलियासँग बढी गोल खान्छौं । तर त्यस्तो हुन पाएन । केहि गोल हामीले आफ्नो गल्तिमा खाएका छौं । त्यसमा हामीले ध्यान दिन आवश्यक देखेको छु । खेल हेर्दा एकदम उत्साहित भइने रहेछ । मैले पुरा खेल हेरे । समर्थकले कति दबाबमा खेल हेर्ने रहेछन् भन्ने महसुस गरे ।
आफु पनि त्यहाँ हुन पाएको भै हुने जस्तो लाग्ने रहेछ । म भएपनि अष्ट्रेलियासँग यो भन्दा फरक नतिजा नआउन सक्थ्यो । तर, आफु भएकोले भए यस्तो गर्थे भन्ने हुने रहेछ । लामो समयको ग्यापले गर्दा म अहिले टोलीमा छैन । प्रशिक्षक कालिनले पनि अहिले लामो विश्राम लियौं , टिममा एडजस्ट हुन गाह्रो हुन्छ भन्नु भएको थियो । म टोलीमा फर्कनका लागि आफ्नो तर्फबाट हर सम्भव प्रयास गर्नेछु । फर्कन आतुर छु,उत्साहित छु । फिट पनि छु । खेलाडीले फिट त हुनै पर्छ ।
