एजेन्सी – अन्तर्राष्ट्रिय मैत्रीपुर्ण खेलमा दक्षिण अमेरिकी राष्ट्र ब्राजिल अफ्रिकी मुलुक नाइजेरियासँग बराबरीमा रोकिएको छ । आइतबार साँझ भएको खेलमा ब्राजिल खेलमा पछि परेर पनि नाइजेरियासँग १–१ गोलको बराबरीमा रोकिएको हो ।

खेलको १२औं मिनेटमा नेयमारलाई ह्यामस्ट्रिङका कारण गुमाएपछि ब्राजिलले सोचेअनुरुपको प्रदर्शन गर्न नसक्दा बराबरीमा रोकिन पुग्यो । खेलको तेस्रो मिनेटमा रोवर्टाे फिर्मिनो गोलबाट चुक्दा ब्राजिल अग्रता लिनबाट चुकेको थियो । १९औं मिनेटमा ब्राजिल आत्मघाती गोलबाट टरेको थियो ।

चुकविजीको क्रसलाई मार्किन्योसले पोस्ट नजिकैबाट क्लियर गरिदिएका थिए । २८औं मिनेटमा नाइजेरियाका गोलरक्षक फ्रान्सिस उजोहोले क्यासमिरोको प्रहारलाई बचाए । ३०औं मिनेटमा फिर्मिनो चुके । ३५औं मिनेटमा ब्राजिल १–० ले पछि प¥यो । नाइजेरियाका जोए एरिवोले मोसेस सिमोनको पासमा गोल गरेका थिए ।

पहिलो हाफमा १–० ले पछि परेको ब्राजिलले दोस्रो हाफको शुरुमै बराबरी गोल फर्काउन सफल भएको थियो । ४८औं मिनेटमा क्यासमिरोले बराबरी गोल फर्काए । ५६औं मिनेटमा जेससको प्रहार गोरक्षक उजोहोले विफल पारिदिए । ६०औं मिनेटमा क्यासमिरोको शक्तिशाली प्रहार क्रसबारमा लागेर फर्कदा ब्राजिल अग्रता लिनबाट चुक्यो ।

७५औं मिनेटमा ब्राजिलका बारबोसा चुक्यो । ८६औं मिनेटमा अजायीले रेनान लोडीको प्रहारलाई ब्लक गरिदिए । त्यसपछि थप गोल निस्कन नसक्दा खेल बराबरीमा सकियो ।