नेपाल र भारतले सोमबारको मैत्रीपूर्ण खेलमा गोलरहित बराबरीमा चित्त बुझाएका छन् । दुबै टोली गोल गर्नबाट पटक पटक चुकेका थिए ।
नेपाल र भारतको बिचको खेल गोलरहित बराबरीमा तुङियो
नेपाली टोलीको रक्षापक्ति र गोलकिपर किरण चेम्जोङ उच्च प्रदर्शन गरेपनि फरवार्डलाइन पुनः गोल गर्नबाट असफल भएको छ । नेपालले सबै खाले अन्तर्राष्ट्रिय प्रतियोगितामा गोल गर्न नसकेको ८ खेल पुगिसकेको छ । दुई बर्षअघि काठमाडौंमा भएको साफ च्याम्पियनसिपमा भारतलाई २–१ ले हराएयता नेपालले कुनै पनि खेलमा गोल गर्न सकेन ।
सोमबारको खेलमा पनि नेपाली टोलीले विपक्षी टोलीमाथि खासै आक्रमण गर्न सकेन । कप्तान सागर थापासहित सन्दीप राईको ठाँउमा खेलेका यु–१९ का अनन्त तामाङ, रोहित चन्द सोही खेलमार्फत ५० क्याप जितेका विराज महर्जन, रविन श्रेष्ठको रक्षापक्तिले भारतीय फरवार्डहरुलाई ९० मिनेटसम्म रोक्न सफल भएका थिए । नेपाल र भारतले बराबरी खेलेको यो लगातार दोस्रो खेल हो । भारत र नेपालले खेलेको यो लगातार दोस्रो गोलरहित बराबरी हो । झन्डै ६ महिना अघि काठमाडौंमा भएको विश्वकप छनोटको दोस्रो लेगमा नेपाल र भारतले गोलरहित बराबरीमा चित्त बुझाएको थियो ।
गुहाटीमा भएको पहिलो लेगमा २–० को जितकै कारण भारतअहिले विश्वकप छनोट दोस्रो चरणमा पुगेको थियो । विश्वकप छनोटको दोस्रो चरणको तयारीकै सिलसिलामा भारतले नेपाललाई मैत्रीपूर्ण खेलको निम्तो दिएको हो । यता नेपालले मैत्रीपूर्ण खेललाई डिसेम्बरमा भारतमै हुने साफ च्याम्पियनसिपको तयारीका रुपमा लिएको छ ।
नेपाल र भारतबीच सोमबारको समेत गरि १८ खेल भइसकेको छ । जसमा नेपालले सन् १९९३ को छैटौं दक्षिण एसियाली खेलकुद (साफ) को फाइनलमा टाइब्रेकरमा जितेसहित ३ खेल आफ्नो पक्षमा पारेको थियो । ३ खेल बराबरीमा टुंगिएका थिए भने १२ खेल भारतले जितेको छ ।
