भरतपुर (हाम्रो खेलकुद) – उपाधि दाबेदारका रुपमा हेरिएको त्रिभुवन आर्मी क्लब टुबोर्ग जेसिज विकास रनिङ शिल्ड राष्ट्रिय फुटबल प्रतियोगिताको सेमिफाइनलबाट बाहिरिएको छ । नारायणगढको क्याम्पाचौरमा जारी प्रतियोगितामा बुधबार घरेलु टोली चितवन ११ सँग २-१ ले पराजित हुँदै आर्मीको यात्रा समाप्त भएको हो ।

पहिलो हाफमा गोलरहित बराबरीमा टुंगिएको खेलमा दोस्रो हाफमा आर्मी सम्हालिन सकेन । ६५ औं मिनेटमा अनिल रानाले गोल गर्दै चितवनलाई अघि बढाए । आर्मीका गोलरक्षक विकेश कुथुले पहिलो प्रहार पन्च गरेपछि रिबाउन्डमा अनिलले गोल गरेका थिए ।

७३ औं मिनेटमा चितवनका कप्तान रुमेश बर्तौलाले गोल गर्दै अग्रता दोब्बर पारे । खेल सकिन ८ मिनेट बाँकी रहँदा आर्मीका लागि डिफेन्डर विमल पाण्डेले गोल फर्काए । तर , त्यसपछि आर्मीले गोल थप्न सकेन र प्रतियोगिताबाट बाहिरियो । विभागीय टोलीविरुद्ध उत्कृष्ट प्रदर्शन गरेका चितवनका जितेश गुरुङ म्यान आफ द म्याच चुनिए ।

चितवनका प्रशिक्षक विजय घलेले रणनीतिअनुसार सबै खेलाडीले राम्रो प्रदर्शन गरेका कारण जित सम्भव भएको बताए । आर्मीका प्रशिक्षक नवीन न्यौपानेले चितवनले राम्रो खेलेको कारण जितेको प्रतिक्रिया दिए । आर्मीको मध्यपंक्तिमा तालमेल नमिल्नाले चितवनले उत्कृष्ट गोल गरेको उनले बताए ।

चितवनले अब उपाधिका लागि बिहीबार हुने दोस्रो सेमिफाइनलको विजेतासँग प्रतिस्पर्धा गर्नेछ । दोस्रो सेमीफाइनलमा नेपाल पुलिस क्लब र संकटाबीच बिहीबार हुनेछ । नारायणगढ जेसीजको आयोजनामा तथा चितवन जिल्ला फुटबल संघ सहआयोजक आयोजक रहेको प्रतियोगिताको विजेताले लाख ६ हजार ६ सय ६६ रुपैयाँ र दोस्रो टोलीले ३ लाख ३ हजार ३ सय ३३ रुपैयाँ प्राप्त गर्नेछ ।