काठमाडौं (हाम्रो खेलकुद)– राष्ट्रिय महिला टोलीकी फरवार्ड सावित्रा भण्डारी ‘साम्बा’ आफ्नो खेल कौशलका कारण त चर्चामा छिन् नै । अन्तर्राष्ट्रिय प्रतियोगितामा नेपालका लागि सर्वाधिक गोल गर्ने खेलाडीको सुचिमा संयुक्त रुपमा पहिलो नम्बरमा रहेकी साम्बा बेला बेला हेयर स्टाइलका कारण पनि चर्चामा हुन्छिन् ।
छोटो कपाल र त्यसलाई रंगाउने उनको सौख नै हो । सम्बा र राष्ट्रिय टोलीकी पूर्व स्ट्राइकर अनु लामाको नाममा समान ३५ गोल छ । यति बेला महिला टोली पोखरामा अर्को महिना स्वदेशमा आयोजना हुने १३ दक्षिण एसियाली खेलकुद (साग) को प्रशिक्षणमा रहेको छ ।
तिहारमा पनि विदा नदिएको महिला टोली प्रशिक्षणमा जुटिरहेको छ । यहि दौरान सम्बाले आफ्नो अर्को सौख पुरा गरेकी छिन्, ट्याटु खोप्ने । साम्बासँगै अनिता बस्नेत र हिरा भुजेलले आइतबार ट्याटु खोपेका छन् । साम्बा र अनिता दुवै युभेन्ट्स तथा अर्जेन्टिना युवा स्टार डिबालाका कट्टर फ्यान । दुवैले डिबालाको जस्तै बायाँ हातमा कालो घेरा खोपाएका छन् । साम्बाले कालो घेराको बीचमा फुटबल पनि खोपेकी छिन् ।
‘म र अनिता हामी दुवै डिबालाको फ्यान हौ,’ सावित्राले भनिन्, ‘यहाँ आएको बेला मौका मिल्यौं । अनि उनको जस्तै ट्याटु खोप्यौं ।’
क्लब फुटबलम पनि सम्बा, अनिता र हिरा साथमै रहने गरेका छन् । एपीएफमा आबद्ध यी तीन खेलाडीमध्य साम्बा र अनिता माल्दिभ्सको फुटसल लिग र गत सिजन भारतीय लिगको सेतुबाट संगै खेलेका थिए । यी दुई आवद्ध टोली महिला लिगको च्याम्पियन बनेको थियो ।
१३ औं साग काठमाडौं र पोखरामा मंसि १५ देखि २४ गते सम्मका लागि तय भएको छ । नेपाली महिला टोली सागमा भाग लिएका सबै संस्करणको फाइनलमा पुगेको छ । यद्दपी टोली अहिले सम्म च्याम्पियन हुन सकेको छैन ।
हरेक पटक भारतसँग पराजित हुँदै नेपाल उप विजेताका रुपमा चित्त बुझाउँदै आएको छ । १३ औं सागको महिला फुटबल पोखरामा तय भएकोले नेपाली टोली लामो समयदेखि पोखरामा रहेर प्रशिक्षण गर्दै आएको छ ।
