काठमाडौं (हाम्रो खेलुकद) – ललितपुरको एनआइबिएल फ्रेन्ड्स क्लबले आसन्न अर्को महिना सुरु हुने सहिद स्मारक ए डिभिजन लिगलाई लक्षित गर्दै ब्राजिलका तीन खेलाडीलाई अनुबन्ध गरेका छ ।

 

ब्राजिलियन तीन खेलाडी साउलो डि अक्विनो, फिलिपे डि सोउजा र वाग्नर डो कार्मो मंगलबार काठमाडौं आइपुगेको हुन् । हो । क्लबले तीन खेलाडीलाई आपसी समझदारीमा ‘ए’ डिभिजन लिग भरको लागि अनुबन्ध गरेको बताएको छ ।

साउलो फरवार्ड, सोउजा डिफेन्डर र वाग्नर मिडफिल्डर हुन् । यी खेलाडीसँग जापनी जे लिग र युरोपियन लिगहरु खेलेको अनुभव रहेको बताइएको छ । क्लबका सदस्य राजाराम तन्डुकारले तीन महिनादेखिको प्रयास सफल भएको र प्रशिक्षक पनि ब्राजिलबाटै ल्याउने तयारी भइरहेको हाम्रो खेलुकदलाई जानकारी गराए ।

ब्राजिली खेलाडीको आगमनसँगै टिम सन्तुलित बन्ने क्लबले विश्वास लिएको छ । त्यसअघि २०६६र६७ को सिजनमा मच्छिन्द्रले इन्डोनेसियन लिग वान क्लब पिएसएममा खेलेका ब्राजिलकै ड्यानियल ब्यारोनीले अनुबन्ध गरेको थियो ।

‘ए’ डिभिजन लिगमा उच्च प्रदर्शन गरेसँगै ड्यानियलले ब्राजिलको शीर्ष डिभिजनका साथै मलेसियाको लिग समेत खेलेका थिए । एनआरटीले पनि विगतमा ब्राजिली खेलाडी ल्याएपनि उनीहरुले उल्लेख्य प्रदर्शन गर्न सकेका थिएनन् ।

अखिल नेपाल फुटबल संघ (एन्फा)ले ए डिभिजन लिग मंसिर २८ गते सुरु गर्ने यसअघि नै सार्वजनिक गरिसकेको छ ।