काठमाडौं (हाम्रो खेलकुद) – राजधानीमा जारी कतार एअरवेज सहिद स्मारक ए डिभिजन लिगमा उपाधिको बलियो दावेदार सानमिगेल मछिन्द्र क्लब र च्यासल युवा क्लब आमनेसामने हुँदैछन् । सातदोबाटोस्थित एन्फा कम्प्लेक्समा हुने खेल दिउँसो १२ बजे सुरु हुनेछ ।

लिगको पहिलो चरणमा दुवै टोलीले सहज जित दर्ता गरेका थिए । मछिन्द्रले ब्रिगेड ब्वाइज क्लबलाई उद्घाटन खेलमा २-० ले हराएको थियो । च्यासलले कप्तान सन्तोष साहुखलको उत्कृष्ट प्रदर्शनमा संकटालाई २-० ले नै पराजित गरेको थियो । दुवै टोलीले पहिलो खेलमा विदेशी खेलाडी नउतारेपनि प्रभावशाली प्रदर्शन गरे ।

मछिन्द्रका लागि योगेश गुरुङ र दीपक राईले गोल गरेका थिए । मछिन्द्रमा स्टार खेलाडीहरुको भिड रहेकाले प्रशिक्षक प्रवेश कटुवाललाई टोली छनोटमा नै केहि समस्या पर्ने देखिन्छ । यू२३ राष्ट्रिय टोलीका कप्तान सुजल श्रेष्ठ चोटका कारण अझै केहि समय बाहिर रहनेछन् । यस्तो अवस्थामा विदेशी खेलाडी नहुँदा दीपक र युवा फरवार्ड रेजिन सुब्बाले अभिषेक रिजालसँग मिलेर आक्रमण सम्हाल्नेछन् ।

यता च्यासलले पनि पहिलो खेलमा उत्कृष्ट प्रदर्शन गरेको थियो । गत सिजनको उपविजेतालाई खेलमा पकड बनाउन नदिएको च्यासल सन्तुलित टोलीको रुपमा देखिएको थियो । विदेशी खेलाडी नहुँदा पनि बलियो देखिएको च्यासलले लिगको उपाधिमा दावेदारी देखाएको छ । फरवार्ड सन्तोष ए डिभिजन लिगमा १ सय गोल पुर्याउने संघारमा छन् ।

अर्को खेलमा दिउँसो ३ बजे दशरथ रंगशालामा ललितपुरका दुई टोली ब्रिगेड ब्वाइज र फ्रेन्ड्स खेल्नेछन् । ब्रिगेड ब्वाइज पहिलो खेलमा पराजित भएपछि पहिलो अंक जोड्न संघर्षरत छ । फ्रेन्ड्सले पनि आर्मीसँग २-० को हार बेहोर्दै लिगमा खराब सुरुवात गरेको थियो । दुवै टोली पहिलो अंक जोड्न प्रयासरत हुनेछन् ।

यो पनि पढ्नुहोस : सन्तोष साहुखल १०० लिग गोलको नजिक