हाम्रो खेलकुद काठमाडौं, भदौ १५– साफ यु–१९ च्याम्पियनसिप टोलीका खेलाडीलाई जनहरी २ लाख रुपैयाँ दिने निर्णय गरेको अखिल नेपाल फुटबल संघ (एन्फा) ले वभिन्न प्रायोजक र कर्पोरेट हाउसहरुसँग युवा टोलीलाई सम्मान गर्न आग्रह गरेको छ ।

गणेश थापाको अध्यक्षमा बसेको बैठकले एन्फामा आबद्ध ४५ जिल्लाबाट १÷१ लाखका दरले रकम संकलन गरि युवा टोलीलाई थप पुरस्कार व्यवस्था गर्ने भएको छ । सरकारले यसअघि नै युवा टोलालाई जनही १ लाख रुपैयाँ दिने निर्णय गरिसकेको छ ।

बैठकले एन्फा एकेडेमीको व्यवस्थापनका लागि सहायक महासचिव मणी कुवरको संयोजकत्वमा पाँच सदस्यीय समिति गठन गरेको छ । समितिको सह संयोजकमा सहायक कोषाध्यक्ष रविन्द्र जोशी, साहायक प्रमुख कार्यकारी अधिकृत राजेन्द्र न्यौपाने, सदस्य दीनेश व्यञ्जनकार र मानार्थ सदस्य मधुसुदन उपाध्याय छन् ।

एन्फाले सदस्य बसन्त अर्याल संयोजक र पूर्व महासचिव लोकबहादुर शाही सह संयोजक रहेको फुटबल समिति गठन गरेको छ । समितिमा ३ सदस्य पछि मनोनित गरिनेछ । बैठकले पूर्व केन्द्रिय सदस्य नुवाकोटका पूर्णमान चित्रकारलाई एक बर्षका लागि मानार्थ सदस्य मनोनित गरेको छ ।

पहाडी जिल्ला इलाम, पाचधर, धनकुटा, सिन्धुपाल्चोक, दोलखा, पाल्पा, स्याङ्जा, लम्जुङ, बाग्लुङ र जुम्लालाई मैदान निर्माणका लागि प्रत्येकलाई १० लाख रुपैयाँ दिने भएको छ । जिल्ला फुटबल संघको भवन बनाइसकेका सुर्खेत र नवलपारसीलाई प्रोत्साहन स्वरुप एन्फाले ५÷५ लाख रुपैयाँ दिने भएको छ ।

लिग शुक्रबारबाट नहुने हाम्रो खेलकुद काठमाडौं, भदौ १५– भूकम्पपछि स्थगित रेडबुल राष्ट्रिय लिग भदौ १८ गतेबाट पुनः सुरु गर्ने एन्फाले यसअघि नै सार्वजनिक गरिसकेको छ । तर, देशका विभिन्न भागमा चलेको आन्दोलनका कारण लिग शुक्रबारबाट सुरु गर्ने सम्भावना टरेको छ । त्यसैलाई मध्यनजर गर्दै एन्फाले बिहीबार सहभागी ९ क्लबका पदाधिकारीबीच छलफलका लागि बैठकमा बोलाएको छ । त्यो बैठकले लिग कहा र कहिलेबाट सुरु गर्ने निर्णय गर्ने एन्फाले जनाएको छ ।

९ टोलीको सहभागिता रहेको लिगमा स्थगित हुनुअघि झापा १६ अंकसहित अग्रस्थानमा छ । एपिएफ १४ अंकसहित दोस्रोमा छ । समान ११ अंक भएका त्रिभुवन आर्मी तेस्रो, थ्री स्टार चौथो, मनाङ मस्र्याङ्दी पाँचौंमा छ । ७ अंक जोडेका पुलिस छैटौं र सुदूर पश्चिमाञ्चल सातौं तथा ४ अंक भएका मोरङ आठौं र लुम्बिनी नवौं स्थानमा छ ।