एजेन्सी – क्रोएसिया तथा इटालियन क्लब युभेन्टसका फरवार्ड मारियो म्यान्जुकिच कतारी क्लब अल दुहेलमा अनुबन्धित हुने भएका छन् । उनी आइतबारै कतारी क्लबमा सम्झौताका लागि पुगेका थिए । 

करिव ४ वर्ष युभेन्टसमा रहेका म्यान्जुकिकले पछिल्लो समय मोरिसियो सार्रीको प्रशिक्षणमा यो सिजन पहिलो रोजाईका कमै मौका पाएका छन् । आफ्नो माग पूरा नगरेपछि युभेन्टस छाड्दै कतारी क्लब अल दुहेलमा अनुबन्धित हुने भएका‌ हुन् । तर, अल दुहेलमा पनि अनुबन्धको रकमबारे सम्झौता भइसकेको छैन । अनुबन्ध रकममा सहमति भए म्यान्जुकिचले युभेन्टस छाड्दै कतारी क्लबमा पुग्नेछ ।

युभेन्टसमा रोनाल्डोको आगमनसँगै उनले पहिलो रोजाईमा कमै मौका पाएका छन् । युभेन्टसमा उनले चार वर्षमा चार सिरी ‘ए’, तीन कोपा इटालियाको उपाधि जितेका थिए । मासिमिलियानोको प्रशिक्षणमा उनले युभेन्टसमा निरन्तर पहिलो रोजाईमा मौका पाएका थिए ।

म्यान्जुकिचले २०१६/१७ को च्यारिम्पयन लिगको फाइनलमा स्पेनिस क्लब रियल म्याड्रिडसँग ४–१ ले पराजित भएको खेलमा सम्झनायोग्य बाइसाइकल किकमा गोल गर्न सफल भएका थिए ।  ३३ वर्षे म्यान्जुकिच पछिल्लो समय इंग्लिस क्लब म्यानचेस्टर युनाइटेडमा अनुबन्धित नजिक रहेपनि त्यो पुरा हुन सकेको थिएन । यससँगै उनी कतारी क्लबतर्फ पुगेका हुन् ।

म्यानचेस्टर पछिल्लो समय अष्ट्रियन क्लब रेडबुल साल्जवर्गका फरवार्ड अर्लिङ ब्राउट हल्यान्डलाई अनुबन्ध गर्ने प्रयासमा रहेका छन् । अल दुहेलले जारी लिगमा ११ चरणको खेल सकिदा ४ अंकको अग्रतासहित शीर्षस्थान ओगटेको छ ।