काठमाडौं (हाम्रो खेलकुद) – सरस्वती युवा क्लबले कतार एअरवेज सहिद स्मारक ए डिभिजन लिगको चौथो चरणसम्म आइपुग्दा अंकको खाता खोल्न सकेको छैन । चौथो खेलमा बिहीबार एपीएफसँग २-१ ले पराजित हुँदा सरस्वतीले दोस्रो हाफको इन्ज्युरी समयमा पहिलो गोल गर्यो । जम्मा ४ खेलमा टोलीले २२ खेलाडी प्रयोग गरिसकेको छ । तर पनि प्रशिक्षक प्रदीप नेपाल रेलिगेसनबाट चिन्तित छैनन् ।

लिगको पहिलो खेलमा एनआरटिसँग ४-० ले पराजित हुँदै सरस्वतीले खराब सुरुवात आत्मसात गर्यो । दोस्रो खेलमा जावलाखेलसँग १-० र तेस्रोमा पुलिससँग २-० ले पराजित भएपछि सरस्वती थप समस्यामा परेको थियो । चौथो खेलमा एपीएफविरुद्धको खेल सरस्वतीका लागि अंकको खाता खोल्ने सुवर्ण अवसर थियो । एपीएफ आफैं पनि रेलिगेसन क्षेत्र वरपर रहेकाले सरस्वती कागजमा पनि खासै कमजोर थिएन ।

तर एपीएफले दोस्रो हाफमा परिवर्तन गरेका खेलाडीको मदतले खेल जित्यो । महत्त्वपूर्ण ३ अंक हासिल गर्यो । यहि ३ अंक सिजनको अन्त्यमा महत्त्वपूर्ण हुने आँकलन गरिएको छ । एपीएफका प्रशिक्षक राजेन्द्र तामाङले पनि यस जितसँगै आफ्नो टोलीलाई रेलिगेसनको डरबाट केहि राहत मिलेको स्वीकारे । तुलनात्मक रुपमा एपीएफले लिगमा राम्रो प्रदर्शन गरेपनि नतिजा हासिल गर्न सकेको थिएन । यस जितले भने टोलीलाई आगामी खेलमा सहज हुने प्रशिक्षक तामाङले बताए ।

यता सरस्वतीका प्रशिक्षक नेपाल भने खेलपछि पनि रेलिगेसनबारे अहिले नै सोच्नुपर्ने अवस्था नरहेको बताइरहेका थिए । ‘ भर्खर ४ खेल सकियो । अझै धेरै खेल बाँकी छ । हामीले रेलिगेसनबारे सोच्नुपर्ने अवस्था आएको छैन । अन्य टोलीको पनि १-२ अंक मात्र छ । हामीले केहि खेलपछि माथि आउन सक्छौं,’ उनले भने ।

नेपालले टोलीको आक्रमणमा केहि कमजोरी हुँदा नतिजा ल्याउन नसकेको बताए । ‘हाम्रो अहिले फिनिसिङ कमजोरी देखिएको छ । आजको खेलमा अवसर मिलेको थियो, मात्र त्यसको सदुपयोग हुन सकेन । अब आउने खेलमा त्यसलाई सुधार्नुपर्ने छ,’ उनले थपे, ‘ विदेशी खेलाडी पनि नयाँ वातावरणमा घुलमिल हुन कठिन भएको छ । गर्मी ठाउँबाट आएका उनीहरु यहाँ चिसो रहेकाले केहि मांशपेशीमा समस्या देखिएको हो । अब आउने खेलमा सहज होला भन्ने आशा छ ।’

नेपालले औसत खेलाडीको जमात रहेकाले टोली छनोटमा पनि निरन्तर परिवर्तन भइरहेको बताए । ‘ हाम्रो टोलीमा सबै औसत खेलाडी छन् । उत्कृष्ट खेलाडी नै भनेर छुट्टयाउने अवस्था छैन । त्यसैले खेलाडी परिवर्तन गर्दै खेलाइरहेका छौं,’ उनले थपे ।

सरस्वतीका लागि हालसम्म मात्र ७ खेलाडीले सबै ४ खेलमा सहभागिता जनाएका छन् । तीमध्य ५ खेलाडी मात्र सबै खेलमा सुरुवाती रोजाईमा रहेका छन् । यू-१९ राष्ट्रिय टोलीका मिडफिल्डर मनीष थापा, डिफेन्डर सुसन लामा, मिडफिल्डर दिपेश श्रेष्ठ र डिफेन्डर दीपक भुषालको प्रदर्शनबाहेक अन्य खेलाडी खासै जम्न सकेका छैनन् । यस्तो अवस्थामा विदेशी खेलाडीले पनि प्रभाव पार्न नसक्नु टोलीका लागि थप समस्या निम्त्याउन सक्छ ।

लिगका ठूला टोलीसँग खेल्न बाँकी रहेको अवस्थामा सरस्वतीले रेलिगेसन टार्न निकै संघर्ष गर्नुपर्ने देखिन्छ । औसत खेलाडीले भरिएको टोलीमा अनुभवी भन्दापनि भेट्रान खेलाडी रहेका छन् । पछिल्लो खेलमा पुलिसविरुद्ध राजकुमार घिसिङ र एपीएफविरुद्ध कृष्णगोपाल श्रेष्ठ एक हाफ पनि मैदानमा टिक्न नसक्नुले सरस्वतीको समस्या प्रष्ट देखाएको छ । औसत टोलीबाट उचित प्लेइङ ११ छनोट गर्न नै अत्यधिक समय खर्चिसकेको सरस्वतीलाई अब शीर्ष डिभिजनमा बसिरहन सहज भने पक्कै छैन ।

यो पनि : सम्पूर्ण जानकारी : ‘ए’ डिभिजन लिग २०७६