लियोन(एजेन्सी) क्रिस्टियानो रोनाल्डो र गेराथ बेलमा को उत्कृष्ट हुने भन्ने अनुमानमा रोनाल्डोले बाजी मारेका छन् । रोनाल्डोको उच्च प्रदर्शनबाट प्रेरित पोर्चुगल आज बिहान बेलको वेल्सलाई २-० ले हराउँदै युरोपियन च्याम्प्यिनसिपको फाइनल पुगेको छ । रोनाल्डो र नानीले गोल गरेपछि सन् १९५८ पछि पहिलो पटक ठूलो प्रतियोगिता खेलिरहेको वेल्सको यात्रा टुंगिएको छ ।
गोल गरेपछि पोर्चुगलका क्रिस्टियानो रोनाल्डो ।
पोर्चुगलले अब फाइनलमा विश्व च्याम्पियन जर्मनी र फ्रान्समध्ये एकसँग प्रतिस्पर्धा गर्नेछ । जर्मनी र फ्रान्सबीच आज भोली बिहान १२ः४५ मा दोस्रो सेमिफाइनल हुँदैछ ।
पहिलो हाफमा दुवै टोलीले कमै जोखिम उठाएको खेलको दोस्रो हाफमा तीन मिनेटको फरकमा पोर्चुगलले दुई गोल गरेको थियो । हंगेरीलाई बाहेक हरेक खेलमा गोलका लागि निकै तड्पेका रोनाल्डोले ५० औं मिनेट हेडमार्फत गोल गरेका थिए । राफेल गुरिरोको क्रसमा उनले हेड गोल गरेका हुन् । त्यसको तीन मिनेटपछि नानीले रोनाल्डोको प्रहारलाई पोष्टको दिशा दिएका थिए ।
