काठमाडौं (हाम्रो खेलकुद)– फुटबल मिसन टुगेदरको आयोजना बुढानिलकण्ठ ग्रासरुट फुटबल काउन्सिलको सहकार्यमा काठमाडौं उपत्यकाको उत्तरी भेगका विद्यालयको सहभागितामा ग्रासरुट फुटबल प्रशिक्षण कार्यक्रमको शनिबार औपचारिक सुरुवात भएको छ ।

बुठानिलकण्ठ स्कुलमा प्रशिक्षण कार्यक्रमको उद्घाटनमा उत्तरी भेगका १५ विद्यालयका झन्डै ४ सय छात्रा छात्राको उपस्थिति थियो । राष्ट्रिय खेलकुद परिषद् (राखेप) सदस्य सचिव रमेशकुमार सिलवालको मुख्य आतिथ्यतामा उद्घाटन भएको थियो ।

प्रशिक्षण कार्यक्रमका लागि अखिल नेपाल फुटबल संघ (एन्फा)कोले ६० वटा बल, २ सय २१ थान बिब्स, ८० मार्कर र ८० वटा कोन प्रदान गरेको एन्फा उपाध्यक्ष एवंम् ग्रासरुटका संयोजक उपेन्द्रमान सिंहले जानकारी दिए ।

ती १५ विद्यालयका विद्यार्थीलाई प्रत्येक शनिबार फुटबलको प्रशिक्षण दिइने बताएको छ । छात्र छात्रालाई राष्ट्रिय टोलीका पूर्व कप्तान, खेलाडीहरुले पनि समय समयमा प्रशिक्षण दिइने तयारी रहेको बताइएको छ । उद्घाटनमा राष्ट्रिय टोलीका पूर्व कप्तान अनिल गुरुङ, पूर्व राष्ट्रिय खेलाडी रमेश बुढाथोकीलगायतले छात्र छात्रालाई प्रशिक्षण दिएका थिए ।

राखेप सदस्य सचिव सिलवाल, एन्फा अध्यक्ष कर्मा छिरिङ शेर्पा, फुटबल मिसन टुगेदरका अध्यक्ष विष्णुगोपाल श्रेष्ठले सहभागी विद्यालयलाई फुटबलगायतका सामग्री हस्तान्तरण गरेका थिए । एन्फा उपाध्यक्ष सिंहले ग्रासरुट फुटबल विकासका लागि फुटबल मिसन टुगेदरसँगै सहकार्य गर्दै जाने विषयमा छलफल अघि बढेको बताए ।

मिसन टुगेदरका पदाधिकारी र सदस्यमार्फत फुटबल विकासको सहकार्य सहज हुने विश्वास व्यक्त गर्दै सिंहले भने, ‘उहाँहरु अधिकांश फुटबल पृष्ठभूमीको हुनुहुन्छ । एक दिनको वर्कसप चलाएर कसरी काम गर्न सकिन्छ भन्ने विषयमा हामी छलफल गर्ने तयारीमा छौं । त्यसले अन्ततः नेपाली फुटबललाई नै फाइदा गर्छ । ‘