काठमाडौं – राष्ट्रिय फुटबल टोलीका मिडफिल्डर रोहित चन्द छैटौं सिजन इन्डोनेसियाको माथिल्लो श्रेणीको लिग खेल्ने तयारीमा छन् । खेल जीवनको लामो समय बिताएको पर्सिजा जकार्ताबाट अर्को दुई वर्ष खेल्ने सम्झौता नविकरण उनले बुधबार मात्रै गरेका छन् ।

एक दशक अघि घरेलु लिगमा डेब्यू गरेयता उनी अधिकांश समय विदेशी क्लबमा आबद्ध भएका छन् । मछिन्द्रबाट २०६६/०६७ को लिगमा डेब्यू गरेका रोहित अर्को सिजन भारतीय (आई) लिग टोली एचएलएलमा आबद्ध भएका थिए । त्यसको अर्को वर्ष उनको यात्रा इन्डोनेसियातिर मोडिएको थियो । सन् २०१५ मा मलेसियाली सुपर लिग टोलीमा आबद्ध भएरपनि सिजन अघि नै चोट लागेपछि उनी झन्डै एक वर्ष मैदान बाहिर रहे ।

२०१७ मा पुनः पर्सिजामा आबद्ध भएयता रोहितको खेल जीवनले नयाँ उचाई लिएको थियो । २०१८ मा उनी सम्मिलित टोली इन्डोनेसियाको लिग च्याम्पियन बन्यो । टोलीलाई च्याम्पियन बनाउन महत्वपूर्ण भूमिका निर्वाह गरेका रोहित त्यति बेला सर्वोत्कृष्ट खेलाडी चुनिएका थिए । उनको त्यो प्रदर्शनलाई क्लबले बिर्सने कुरै भएन । गत सिजन पनि उनी त्यहि निरन्तर रहे । हरेक पटक उनको सम्झौता एक वर्षका लागि हुने गथ्र्यो ।

यसपटक भने सम्झौता दुई वर्षका लागि गरिएको छ । त्यसबाट पनि रोहित र उनको क्लबले एकअर्कालाई कत्ति महत्व दिएका छन् भन्ने प्रष्ट हुन्छ । झन्डै दुई दशक इन्डोनेसियाको फुटबलमा सक्रिय रहेका पामुङकासले बामबाङले गत सिजन खेल जीवनबाट सन्यास लिएका थिए । खेल जीवनको अधिकांश समय पर्सिजा बिताएका पामुङकास छाडेपछि पछि क्लबको सबै भन्दा पुराना खेलाडीमध्ये रोहित एक हुन् ।

दुवै पक्षले सम्झौता रकम वा पारिश्रमिक अहिले सम्म सार्वजनिक गरेका छैनन् । तर, पनि हरेक सिजन उनको पारिश्रमिकमा भने वृद्धि भइरहेको बताइएको छ । रोहितको पर्सिजा आफ्नो परिवार जत्तिकै मान्छन् र नेपालकै क्लबलाई जत्तिकै आफ्नोपन रहेको बताउँछन् ।

क्लबसँगको सम्झौता नविकरणमा रोहितले खुसी व्यक्त गरेका छन् । ‘क्लबको व्यवस्थापन र समर्थकहरुले एकदमै माया गर्छन । क्लबमा अहिले विदेशी खेलाडी मध्ये सबैभन्दा लामो समय खेल्ने अवसर पाउने म नै हो,’ उनले भने,‘ पर्सिजाको मलाई हाम्रो देशको क्लब जत्तिकै माया लाग्छ । इन्डोनेसियामा अरु क्लबबाट प्रस्ताव पनि आउँछन् । तर, मेरो लागि यहि क्लब सहि लाग्छ । ’

रोहित विश्व कप छनोटका लागि चैतमा स्वदेश फर्कनेछन् । नेपालले चैतमा विश्व कप छनोटका २ खेल खेल्नेछ । चैत १३ गते चाइनिज ताइपेसँग प्रतिस्पर्धा गर्ने नेपालले त्यसको ५ दिन पछि अष्ट्रेलियासँग खेल्नेछ । अहिले सम्म विश्व कप छनोटमा नेपालले ८ मध्ये ५ खेल खेलिसकेको छ ।

कुवेतसँग ७–० र अर्को खेलमा १–० ले हारेको नेपालले अष्ट्रेलियासँगको खेलमा ५–० र जोर्डनसँगको खेल ३–० ले गुमाएको थियो । नेपालले एकमात्र खेलमा चाइनिज ताइपेलाई २–० ले हराएका थियो । त्यो दुवै गोल अन्जन विष्टले गरेका थिए ।