काठमाडौं (हाम्रो खेलकुद)– यू १९ फुटबल टोलीका पूर्व कप्तान सुलभ मास्के जारी कतार एयरवेज सहिद स्मारक ए डिभिजन लिगका बाँकी खेलमा खेल्ने भएका छन् । अष्ट्रेलिया बस्दै आएका सुलभ लिगकै लागि स्वदेश फर्केका बताइएको छ ।

उनी यसपटक ब्रिगेड ब्वाइज क्लब (बिबिसी) को जर्सीमा लिगमा उतर्ने तयारीमा छन् । बिबिसीका कप्तान अनिल गुरुङका अनुसार सोमबार स्वदेश आइपुगेका सुलभले बुधबार टोलीसँग प्रशिक्षण गरेका थिए । ‘सुलभको आगमनले टोलीको प्रदर्शनमा पक्कै सकारात्मक प्रभाव पर्नेछ ,’ अनिलले भने, ‘फिट पनि देखिन्छन् । अलिक अगाडिबाट ल्याउन सकेको भए यो भन्दा राम्रो नजिता निकाल्न सकिन्थ्यो । ‘

शीर्ष ६ भित्र पर्ने योजनाका साथ लिग सुरु गरेको भएपनि विदेशी खेलाडीको प्रदर्शन नभएका कारण अब लक्ष्य प्राप्ती कठिन देखिएको अनिलले बताए । नेपाल आयल निगम मनाङ मस्र्याङ्दी क्लबका पूर्व मिडफिल्डर सुलभ बिहीबार न्यू रोड टिम (एनआरटी) विरुद्ध उत्रने सम्भावना रहेको छ ।

सुलभ उनै खेलाडी हुन् जसको गोल गत वर्ष अष्ट्रेलियाको वर्षको उत्कृष्ट गोलको उपाधि जित्न सफल भएको थियो । अष्ट्रेलियन एफए कपको राउन्ड अफ ३२ अन्तर्गत हेलेकिन एट्लेटिकका लागि उनले गरेको गोल गोल एएफए कप २०१८ को उत्कृष्ट गोल चुनिएको थियो ।

८ खेलमा २ जित, २ बराबर र ४ खेलमा हार बेहोरेको बिबिसी ८ अंकसहित १० औं स्थानमा छ । अनिलका अनुसार सुलभले लिगका बाँकी ५ खेल नै खेल्नेछन् ।