काठमाडौं (हाम्रो खेलकुद) – युवा फरवार्ड संजोक राईले दोस्रो हाफमा ह्याट्रिक प्रहार गरेपछि रुस्लान थ्री स्टार क्लबले कतार एयरवेज सहिद स्मारक ए डिभिजन लिगमा सानदार जित हासिल गरेको छ ।

दशरथ रंगशालामा शनिबार भएको खेलमा थ्री स्टारले सरस्वती युवा क्लबलाई ४-० ले पराजित गर्यो । खेलको पहिलो हाफ गोलरहित बराबरीमा टुंगिएपनि दोस्रो हाफमा थ्री स्टारले दुई खेलाडी परिवर्तन गरेपछि उत्कृष्ट प्रदर्शन गरेको थियो ।

खेलकाे १२अौं मिनेटमा सन्जाेक राईको पासमा लालरमावियाकाे प्रहारलाई गोलरक्षकले सहजै बचाए । लगत्तै हम्जातकाे प्रहार अाकासिदा थ्रीस्टार अग्रता लिनबाट चुक्यो । १७अौं मिनेटमा हम्जातकाे बक्सभित्रको प्रहार पोस्टबाट थोरै बाहिरियो । १८अौं मिनेटमा हम्जातले एक डिफेन्डरलाई बिट गर्दै गरेको प्रहार खेर गयो । १९अौं मिनेटमा सन्जोक राईको पासमा हम्जातको हेडरले पोस्टको दिशा लिन सकेन ।

हम्जातले लगातार गोल गर्ने अवसर चुकाएपछि प्रशिक्षक मेघराज केसीले उनको स्थानमा सुसान श्रेष्ठलाई मैदान छिराएका थिए । ३८अौं मिनेटमा सुशील राईले पेनाल्टी बकस बाहिरबाट गरेको प्रहार सरस्वतीका गोलरक्षक प्रदिप भण्डारीले सहजै बचाए ।

४८अौं मिनेटमा लालरमावियाले गोल गर्दै थ्रीस्टारलाई अग्रता दिलाए । पेनाल्टी बक्समा सुशील राईकाे प्रहार विफल भएपनि वर्षात गुरुङकाे ब्याक पासमा लालरमावियाले क्लोज रेन्जबाट गोल गर्न सफल भए । ५७अौं मिनेटमा अशोक खवासकाे क्रसमा सुशान श्रेष्ठकाे हेडर पासमा सन्जोक राईले गोल गर्दै थ्रीस्टारको अग्रता दोब्बर भयो ।

६०अौं मिनेटमा डिफेन्डर पुर्ण बहादुर श्रेष्ठको गल्तीमा सुशील राईको ब्याक पासमा सन्जोक राईले बक्स बाहिरबाट टर्न गर्दै गरेको सशक्त प्रहार सिधै गोलमा परिणत भएको थियो । त्यसपछि फ्रिकिकमा आएको बललाई विनोद केसीले गरेको प्रहार थ्रीस्टारका गोलरक्षक प्रिसोले बचाए ।

७१अौं मिनेटमा सन्जाेक राईले गोल गर्दै ह्याट्रिक गरेपछि थ्रीस्टारले खेलमा ४-० को अग्रता बनायो । उनी लिगमा ह्याट्रिक गर्ने पहिलो खेलाडी बने । अशोक खवासको लामो पासमा गोलरक्षक प्रदिप भण्डारी अघि बढेको अवस्थामा सन्जोकले गोल गर्न सफल भएका थिए।

यस जितसँगै थ्रीस्टार १० खेलमा १७ अंक जोड्दै चौथो स्थानमा छ । सरस्वती भने अंक तालिकाको पुछारमा ४ अंक जोडेको छ ‌।