अखिल नेपाल फुटबल संघ एन्फा का अध्यक्ष गणेश थापाले अदालतको मानहानी हुने गरि बुधबार पत्रकार सम्मेलन गरेका छन् । पुनरावेदन अदालत पाटनले एन्फाको बुधबारका लागि तय साधारण सभा रोक्न अन्तरिम आदेश जारी गरेपछि थापाले पत्रकार सम्मेलन प्रक्रिया पुरा गरेको जीकिर गरेका छन् । एन्फा उपाध्यक्ष कर्मा छिरिङ शेर्पा, विजयनारायण मानन्धर र सदस्य पंकज नेम्बाङले विधान विपरित साधारण सभा गर्न लागेको भन्दै उजुरी दिएपछि पुनरावेदनले मंगलबार अन्तरिम आदेश जारी गरेको थियो ।

विचाराधिन मुद्दामा पत्रकार सम्मेलन गर्न मिल्छ भन्ने प्रश्नमा संविधान सभाका सभासद समेत रहेका थापाको जवाफ थियो,‘ हामीलाई त्यो सरोकार भएन । मलाई त्यो विषयमा खासै जानकारी पनि छैन । फुटबल रोकिनु हुन्न भन्ने हाम्रो स्पष्ट धारण छ ।’

अदालतको निर्णयको सम्मान गर्दै साधारण सभा रोकेको भन्दै बोल्न सुरु गरेका थापाले ३ उपाध्यक्ष र १ सदस्य कारवाहीमा रहेका कारण साधारण सभामा नबोलाइएको बताए । ‘ लागतार ३ बैठकमा उपस्थित नभएपछि उहाँहरुलाई स्पष्टिकरण सोधिएको छ । जवाफ नआएपछि उहाँहरु ४ जनालाई एन्फाले कारवाही गरेको छ । त्यसैले बोलाउने कुरै आउँदैन ।’ एन्फाले चैत ५ गते असन्तुष्ट ४ ९उजुरीकर्ता ३ र अर्का उपाध्यक्ष किशोर राई जनालाई ३५ दिन भित्र चित्त बुझ्दो जवाफ नदिए फुटबलका सबै गतिविधिबाट प्रतिबन्ध लगाउने निर्णय गरेको थियो ।

अन्तरिम आदेशलाई निरन्तरता दिनु पर्ने नपर्ने विषयमा छलफल गर्न पुनरावेदनल बिहीबार दुवै पक्षलाई बोलाएको छ । असन्तुष्ट पक्षले गत बर्ष एन्फा र अध्यक्ष थापाविरुद्ध सार्वजनिक लेखा समिति, अख्तियार दुरुपयोग अनुसन्धान आयोग, सम्पत्ती सुद्धिकरणमा उजुरी दर्ता गराएका थिए । तर, थापामाथि अहिले सम्म कुनै कारवाही भएको छैन । स्वदेश भित्र निकै विवादमा परेपछि थापा पटक पटक गरि सात महिना फुटबलका सबै गतिविधिबाट अलग रहेको स्वयम घोषणा गर्दै फिफालाई जानकारी दिएका थिए । असार १३ बाट भने उनी पुनः फुटबलमा सक्रिय भएका थिए । लेखा समितिको निर्देशनमा गत बर्ष पनि एन्फा साधारण सभा स्थगित भएको थियो ।