काठमाडौं (हाम्रो खेलकुद)– सानमिगेल मछिन्द्र क्लबले कतार एयरवेज सहिद स्मारक ए डिभजिन लिगमा सोमबार जारी खेलमा संकटा क्लबविरुद्धको पहिलो हाफमा १–० को अग्रता लिएको छ ।

पहिलो हाफका लागि १ मिनेट बाँकी रहँदा देवेन्द्र तामाङले गोल गर्दै मछिन्द्रलाई अग्रता दिलाएका हुन् । रञ्जित धिमालको कर्नरमा देवेन्द्रले हेडमार्फत गोल गरेका थिए ।

सातदोबाटोस्थित एन्फा कम्प्लेक्सको मैदानमा २६ औं मिनेटमा अर्नेस्ट टम्पीले विपक्षीको प्रहारलाई क्लियर गर्न खोज्दा आफ्नै पोस्टमा पुग्दा संकटाका गोलरक्षक विनय श्रेष्ठले उत्कृष्ट डाइभ दिदै बचाए । लगत्तै प्राप्त कर्नरमा एडिलाजा सोमिडेको हेडर पोस्टबाट थोरै बाहिरदा मछिन्द्र अग्रता लिनबाट चुक्यो । ४० औं मिनेटमा दीपक राईको बक्स बाहिरको प्रहार गोलरक्षक विनय श्रेष्ठले सहजै बचाए ।

शीर्षस्थानमा रहेको त्रिभुवन आर्मी क्लबसँग उपाधि होडलाई कायम राख्नका लागि पनि आजको खेल मछिन्द्रका लागि महत्वपूर्ण रहेको छ । १२ औं चरणको खेलमा आर्मीले मंगलबार ब्रिगेड ब्वाइज क्लबको सामना गर्नेछ ।

मछिन्द्र र आर्मीले आ आफ्नो खेलमा सफलता हासिल गरेको खण्डमा शनिबार हुने अन्तिम खेल उपाधि छिनोफानोका लागि निर्णायक हुनेछ । ११ चरणको समाप्तीमा यी दुई टोलीबीच १ अंकको फरक रहेको छ । आजको खेलमा मछिन्द्र विजयी भएका कम्तीमा एक दिनका लागि अंक तालिकाको शीर्षस्थानमा उक्लनेछ ।