२९ असार, काठमाडौं । काठमाडौं नयाँबजारको गीताञ्जली कलेजले केहि नेपाली राष्ट्रिय टोलीका खेलाडीसहित १८ फुटबलरलाई पूर्ण छात्रबृति प्रदान गरेको छ ।
राष्ट्रिय टोलीका खेलाडीहरु अञ्जन विष्ट, एलन न्यौपाने, प्रकाश बुढाथोकी, मानबहादुर तामाङ लगायतका खेलाडीहरुले गीतान्ञ्जली कलेजबाट पुर्ण छात्रबृतिमा कक्षा ११ र १२ अध्ययन गर्नेछन् । यस्तै अन्डर १६का रेजिन सुब्बा, राजिभ लोप्चन, असिम भुसाल, सेसेहांग अंग्देम्बे, लगायतले पनि पूर्ण छात्रवृत्ति पाएका छन्।
कलेजले कार्यक्रममा राष्ट्रिय फुटबल टोलीका खेलाडीलाई पनि सम्मानित गरेको थियो । राष्ट्रिय टोलीका उपकप्तानद्वय बिराज महर्जन र रोहित चन्दपनि सो कार्यक्रममा उपस्थित थिए । क्याम्पस प्रमुख कोइराला, राखेप उपाध्यक्ष तथा ओलम्पिक कमिटीका महासचिव लामाटेण्डी शेर्पा लगायतले खेलाडीहरुलाई सम्मान गरेका थिए । राष्ट्रिय बास्केटबल टोलीका कप्तान सदिश प्रधानलाई पनि सोहि कार्यक्रममा सम्मान गरिएको थियो।
साथै कार्यक्रममा गीताञ्जली कलेजमा १२ कक्षामा अध्ययनरत राष्ट्रिय आर्चरी खेलाडी सुनिता मोक्तानलाई पनि पूर्ण छात्रबृतिको घोषणा गरिएको छ ।
