एजेन्सी – अपराजित रहेको मर्सिसाइड क्लब लिभरपुलले इंग्लिस प्रिमियर लिगमका २५ अंकको फराकिलो अग्रता बनाएको छ । शनिबार राति भएको खेलमा नर्विच सिटीलाई १–० ले पराजित गर्दै लिभरपुलले २५ अंकको फराकिलो अग्रतासहित उपाधि यात्रालाई बलियो बनाएको छ ।

लिभरपुलले एक खेल कम खेलेको साविक विजेता म्यानचेस्टर सिटीलाई २५ अंकले पछि पारेको हो । लिभरपुलको २६ खेलबाट ७६ अंक पुगेको छ । लिभरपुलले २५ खेलमा जित र १ बराबरीको नतिजा निकालेको छ । एक खेल कम खेलेको म्यानचेस्टर सिटीको ५१ अंक छ ।
अब लिभरपुललाई उपाधि जित्न अब बाँकी १२ खेल मध्य मात्र ५ खेलमा जित आवश्यक छ ।

लिभरपुलको जितमा वैकल्पिक खेलाडीको रुपमा मैदान छिरेका साडियो मानेले दोस्रो हाफमा गरेको गोल नै निर्णायक बन्यो । मानेले ७८औं मिनेटमा गोल गरेका थिए । कप्तान जोर्डन हेन्डरसनको पासलाई सदुपयोग गर्दै उनले गोल गरेका थिए ।

उनी ६०औं मिनेटमा एलेक्स अक्सलेड चेम्वरलेनको स्थानमा मैदान छिरेका थिए । चोटका कारण पछिल्लो दुई खेल गुमाएका मानेले मैदान फर्कदै गोल गर्न सफल रहे । नर्विचविरुद्ध लिभरपुलले खेलमा बल पोजेसन राखेपनि गोलको लागि दोस्रो हाफ नै कुर्नुपरेको थियो ।

लिभरपुलसँग पराजित नर्विच २६ खेलबाट १८ अंक जोडेर रेलिगेसन जोनको पुछारमा रहेको छ ।