धनगढी (हाम्रो खेलकुद) – गोलरक्षक निगम सिंह नायक बन्दा भारतको कञ्चनजंघा फुटबल क्लब धनगढीमा शुक्रबारबाट शुरु भएको चौथो नेपाल आईस सुदूरपश्चिम अन्तर्राष्ट्रिय आमन्त्रण खप्तड गोल्डकप फुटबल प्रतियोगिताको क्वाटरफाइनलमा प्रवेश गरेको छ ।

धनगढी रंगशालामा शुक्रबार भएको प्रतियोगिताको पहिलो खेलमा बाग्मती युवा क्लब सिराहालाई पेनाल्टी सुटआउटमा ४–२ ले पराजित गर्दै कञ्चनजंघा अन्तिम आठमा पुग्न सफल भएको हो ।
कञ्चनजंघाले अधिकांश समय बल पोजेसन राखेपनि बाग्मतीको रक्षापङ्ति तोड्न नसक्दा खेलको निर्णय पेनाल्टी सुटआउटबाट लिइएको हो ।

कञ्चनजंघालाई जिताउन गोलरक्षक निगम सिंह नायक बने । उनले बाग्मतीका विपिन तुमसिङ मगर र अनिल मगरको प्रहारलाई रोकेका थिए । निगम सिंह खेलको म्यान अफ द म्याच भए । उनले नगद १० हजारसहित ट्रफी पाए । अब कञ्चनजंघाले क्वाटरफाइनलमा आयोजक सुदूरपश्चिम–११ स्पोर्टस क्लबसँग खेल्नेछ ।

सुदूरपश्चिम–११ स्पोर्टस क्लबको आयोजनामा जारी प्रतियोगिता फागुन २० गतेसम्म सञ्चालन हुने छ । प्रतियोगिता अन्तर्गत शनिवार सशस्त्र प्रहरी बल (एपिएफ) र न्युरोड टिम (एनआरटी) बीच प्रतिस्पर्धा हुने छ ।

प्रतियोगिताको विजेतालाई २१ लाख १ रुपैँया तथा उपविजेतालाई १० लाख १ रुपैँया, ट्रफी, मेडल तथा प्रमाणपत्र प्रदान गरिने छ । धनगढी रगशालामा हुने प्रतियोगिताको उत्कृष्ट खेलाडीलाई मोटरसाईकल, विभिन्न विधाका उत्कृष्ट खेलाडीलाई १५÷१५ हजार पुरस्कार प्रदान गरिने छ ।

यसअघि सुदूरपश्चिम प्रदेशका मुख्यमन्त्री त्रिलोचन भट्टले प्रतियोगिताको उद्घाटन गरेका थिए ।