प्रकाश तिमल्सिना, काठमाडौं

फरवार्ड विमल घर्तीमगर निलम्बनबाट फर्केपछि मैदानमा आफू पुरानै लयमा रहेको संकेत गरिरहेका छन् । अनुशासन उल्लङ्घन गरेका कारण अखिल नेपाल फुटबल संघ (एन्फा) बाट ९० दिन निलम्बनमा परेका विमल फागुनको पहिलो दिन फुकुवा भए ।

संयोग नै भन्नुपर्छ सहिद स्मारक ए डिभिजन लिगकै सबैभन्दा महत्त्वपूर्ण खेलबाट विमलले मैदानमा पुनरागमन गर्ने अवसर पाए । लिग उपाधि छिनोफानो हुने त्रिभुवन आर्मी क्लबविरुद्धको अन्तिम खेलमा उनी सानमिगेल मछिन्द्र क्लबबाट उत्रेका थिए । उक्त खेलमा पहिलो रोजाईमा खेलेका विमलले गोल त गरेनन् तर मछिन्द्रको पहिलो उपाधि जितमा केहि पुरानो छनक भने देखाए । पुनरागमनपछिको पहिलो खेलमा सुखद नतिजा हासिल गरेका विमलले त्यसयता भने प्रभावशाली प्रदर्शन गर्दै आएका छन् ।

लिग उपाधि जितेपछि मोफसलका प्रतियोगितामा खेल्न पूर्व यात्रामा निस्केको मछिन्द्रले आइतबार मात्र रुस्लान थ्री स्टार क्लबलाई १–० ले हराउँदै सताक्षी गोल्डकप फुटबल प्रतियोगिताको उपाधि जितेको थियो । फाइनलमा उनै विमलले गरेको गोल निर्णायक बनेको थियो । त्यसअघि पहिलो खेलमा पनि उनी मछिन्द्रको जितमा गोल गर्दै म्यान अफ दी म्याच बनेका थिए ।

लिगपछि मछिन्द्रले खेलेका मोफसलका ४ खेलमा उनले ५ गोल गरिसकेका छन् । धरानमा जारी बुढासुब्बा गोल्डकपको अन्तिम क्वार्टरफाइनलमा मंगलबार विमलले ह्याट्रिक गरेपछि मछिन्द्रले भारतीय क्लब सन्डे एफसीलाई ६–१ ले हरायो । उक्त खेलमा पनि विमल म्यान अफ द म्याच घोषित भए ।

लामो समयपछि प्रतिस्पर्धात्मक खेलमा मैदान उत्रेका विमल मैदानमा लगातार राम्रो प्रदर्शन गरिरहेका छन् । तर उनको भनाई मान्ने हो भने लामो उनलाई खेल्न अझै कठिन भइरहेको छ । ‘राम्रो टोलीबाट खेल्न पाएकोले पनि होला । गोल गरिरहेको छु र खुसी छु । तर म अझै यो भन्दा बढी राम्रो गर्न सक्छु भन्ने विश्वास छ । अझै उच्च लय समाउन बाँकी रहेको छ,’ उनले भने ।

६ वर्ष भन्दा लामो समयदेखि राष्ट्रिय टोलीबाट नियमित खेल्दै आएका विमलका लागि मोफसलमा राम्रो गर्नुपर्ने बाध्यता पनि छ । घरेलु मैदानमा अर्को महिना चाइनिज ताइपेइ र अष्ट्रेलियाविरुद्ध हुने विश्वकप छनोटको बन्द प्रशिक्षणमा उनी समेटिएका छैनन् । अझै दुई महिना वा त्यो भन्दा लामो समय मोसफलका नकआउट प्रतियोगिता जारी रहनेछन् । विमलले त्यसमै गरिने प्रदर्शनका आधारमा राष्ट्रिय टोलीमा पुनरामगनको अपेक्षा राखेका छन् ।

‘आफ्नो गल्तिले गर्दा टोलीबाट निलम्बनमा परे । यो बीचमा साह्रै दुःख महसुस गरे । जुन म शब्दमा भन्न सक्दिन,’ उनले भने,‘
निलम्बनको कारण मैले लिग खेल्न पाइन । जसले सायद म राष्ट्रिय टोलीमा परिन । लामो समयदेखि राष्ट्रिय टोलीबाट खेलिरहेको भएर होला टोलीमा छैन भन्दा खल्लो लाग्ने रहेछ ।’

क्लबले भाग लिने सबै प्रतियोगितामा आफ्नो तर्फबाट अझै राम्रो गर्न प्रयास गर्ने विमलले सुनाए । ‘मेरो अबको लक्ष्य प्रष्ट छ । म राष्ट्रिय टोलीमा जति सक्दो छिटो फर्किन चाहन्छु । राष्ट्रिय टोलीमा हुनु भनेको मेरो लागि प्रतिष्ठाको विषय पनि हो । क्लबबाट राम्रो प्रदर्शन गरेर छिटो भन्दा छिटो कमब्याक गर्ने मेरो प्रयास हो,’ विमलले थपे ।

यसअघि मंसिर ३ गते कुवेतविरुद्ध विश्वकप छनोटको खेलका लागि भुटान जाने अघिल्लो रात अबेरसम्म डिस्कोमा बसेका कारण विमलसहित ४ खेलाडी कारवाहीमा परेका थिए । त्यसै घटनामा अखिल नेपाल फुटबल संघ (एन्फा) ले विमल र दीनेश राजवंशीलाई ९० दिन तथा अन्जन विष्ट र सन्तोष तामाङलाई ४५ दिन निलम्बनमा परेका थिए । चारै जनालाई ५० हजार रुपैयाँ जरिवाना पनि गरिएको थियो ।

अन्जन र सन्तोषले लिगमा कमब्याक गर्दै उच्च प्रदर्शन गरेका थिए । लिगमा सन्तोषको टोली आर्मी दोस्रो र अन्जनको टोली मनाङ तेस्रो बनेको थियो । अन्जन लिगका ३ खेलमा म्यान अफ दी म्याच पनि बनेका थिए । यी चारमध्य अन्जन मात्र राष्ट्रिय टोलीको प्रशिक्षणमा डाकिएका छन् । अन्जन र सन्तोषले लिगमा गरेको प्रदर्शनबाट विमल निकै उत्साहित थिए । विमलले पुनरागमनअघि भनेका थिए,‘ उनीहरुको प्रदर्शनबाट मेरो मनोबल बढेको छ । आफूले पनि पुरानै लयमा खेल्न सक्छु भन्ने आशा लागेको छ ।’

मोफसलका दोस्रो प्रतियोगिता खेलिरहँदा विमलले फर्ममा रहेको संकेत गरेपनि राष्ट्रिय टोलीमा कमब्याक गर्नका लागि भने अझै केहि समय कुर्नुपर्ने छ । कारण राष्ट्रिय टोलीका प्रशिक्षक योहान कालिनले लिगको प्रदर्शनलाई आधार मानेर राष्ट्रिय टोलीको लागि प्रारम्भिक टोलीको छनोट गरिसकेका छन् ।

प्रशिक्षक कालिनले कुवेतविरुद्ध खेलअघि अनुशासनको कारवाहीमा परेका फरवार्ड विमल घर्तिमगर, मिडफिल्डर सन्तोष तामाङ र डिफेन्डर दीनेश राजवंशीलाई टोलीमा समेटेनन् । त्यसै घटनामा कारवाही भोगेका अन्जन विष्ट भने टोलीमा छन् । कालिनले गत साता हाम्रोखेलकुदसँग अन्तर्वार्तामा विमललगायत खेलाडी टोलीमा नपर्नुलाई अनुशासनसँग मात्र जोड्न नमिल्ने बताए ।

‘यदि हामीले आफ्नो खेल सुधार्ने हो भने अनुशासन पनि महत्त्वपूर्ण हुन्छ । तर विमल लगायत खेलाडी अनुशासन कै कारणले टोलीमा नपरेका भने होइनन् । हामीले उपलब्ध खेलाडीबाट उत्कृष्ट टोली निर्माण गर्न लागेका छौँ । अहिले प्रारम्भिक टोलीमा छनोट भएका खेलाडीबाट नै हामी राम्रो टोली बनाउन सक्छौं,’ प्रशिक्षक कालिनले प्रष्ट पारे ।

कम्तिमा पनि अहिलेको अवस्थामा विमल घरेलु मैदानमा हुने विश्वकप छनोटमा राष्ट्रिय जर्सीमा देखिने छैनन् । यसअघि निलम्बनकै कारण दक्षिण एसियाली खेलकुद (साग) गुमाएका उनले विश्वकप छनोट अन्तर्गत जुन महिनामा घरेलु मैदानमा जोर्डनविरुद्ध हुने अन्तिम खेलका लागि टोलीमा पर्न भने निरन्तर राम्रो प्रदर्शन गर्नुपर्नेछ ।

यो पनि पढ्नुहोस : ‘नयाँ खेलाडीको प्रदर्शन हेर्न उत्साहित छु’ – कालिन