काठमाडौं(हाम्रो खेलकुद)- शीर्ष डिभिजनमा उक्लने लक्ष्य बोकेको एराउन्ड दि हिमालयज बाँसकारी क्लबले सहिद स्मारक ‘बी’ डिभिजन लिग फुटबलमा लगातार तेस्रो जित निकालेको छ । बाँसबारीले मध्यपुर युथ एसोसिएसनमाथि ५–२ को फराकिलो जित निकालेको हो ।

बाँसबारीले यसअघि पहिलो खेलमा श्री भगवती र दोस्रो खेलमा ब्वाइज युनियनलाई पराजित गरेको थियो । मध्यपुरको यो लगातार तेस्रो हार हो । मध्यपुर पहिलो खेलमा खुमलटार दोस्रो खेलमा श्री भगवतीसँग पराजित भएको थियो । सातदोबाटोस्थित एन्फा कम्प्लेक्सको खेल मैदानमा बाँसबारीको जितमा सुलेमान थापा मगर र सजिन थापा मगरले २–२ तथा सुरेश कुमालले एक गोल थपे ।

मध्यपुरका धिरज श्रेष्ठ र सन्नी लामाले गोल गरेपनि हार टार्न सकेन । खेलको पहिलो मिनेटमा नै सुलेमान थापाको गोलमा बाँसबारीले खेलमा अग्रता बनाएको थियो । छैटौ मिनेटमा सजिन थापाले गोल गदै अग्रता दोब्ब पारे । ११औं मिनेटमा सुलेमनले गोल गरेपछि बाँसबारीले ११ मिनेटभित्रै ३–० को आरामदायी अग्रता लिन सफल भएको थियो ।

१८औं मिनेटमा धिरज श्रेष्ठले गोल गर्दै मध्यपुरलाई खेलमा फर्काउने प्रयास गरेका थिए । पहिलो हाफको थप गरिएको इन्ज्युरी समयको थप गरिएको दोस्रो मिनेटमा सजिनले व्यक्तिगत दोस्रो गोल गरेपछि बाँसबारीले पहिलो हाफमा ४–१ को अग्रता लिन सफल भयो ।

७०औं मिनेटमा सुरेश कुमालले गोल गर्दै बाँसबारीलाई फराकिलो जिततर्फ अग्रसर गराए । ८५औं मिनेटमा सन्नी लामाले गोल गरेपनि मध्यपुरको हार टार्न सकेन । लगातार तेस्रो जितसँगै बाँसबारी ९ अंक जोडेर शीर्षस्थानमा उक्लिएको छ । प्रतियोगितामा सोमबार पुल्चोक स्पोर्ट्स क्लब र सातदोबाटो युथ क्लबबीच खेल हुनेछ । खेल दिउँसो ३ः३० बजे हुनेछ ।