दिपक बोहोरा, इलाम

इलाममा जारी छैटौं माइभ्याली आयोजक टोली माईभ्याली गोल्डकप फुटबल प्रतियोगिताको पहिलो सेमिफाइनलमा आज ए डिभिजन लिग विजेता मछिन्द्र क्लब र भारतको मानेभञ्जाङ फुटबल क्लब दार्जिलिङले प्रतिस्पर्धा गर्दै छन् ।

इलाम स्थित ठुलो टुडिखेलमा दिउँसो ३ बजे फाइनल प्रवेशका लागि दुई टोली प्रतिस्पर्धा गर्दैछन् । दुवै टोली जितको लक्ष्यसाथ मैदानमा उत्रने छन् । नेपाल स्टार खेलाडीहरुको मिश्रणमा बनेको मछिन्द्र क्लब लिग जितेको एक सातामै सताक्षी गोल्डकपको उपाधि जितेर उच्च मनोबलका साथ इलाम आएको छ । मछिन्द्र क्लबले क्बाटर फाइनलमा मोफसलको गोर्खा ब्वाइज रुपन्देहिलाइ टाइबेकरमा हराउदै सेमिफाइनल सम्मको यात्रा तय गरेको हो ।

यता मानेभञ्जाङ फुटबल क्लबले मोफसलको चर्चीत क्लब झपा ११ लाई २–१ गोलले हराउदै सेमिफाइनल सम्मको यात्रा तय गरेको हो । सेमिफाइनलको लागी दुवै प्रशिक्षकहरु आफ्नो टिम आजको खेलको लागी तयार भइसकेको बताएका छन् । मछिन्द्रका प्रशिक्षक प्रवेश कटुवालले लिग पछाडी सताक्षी गोल्डकप र बुढासुब्बा गोल्डकप सहभागी भइसकेको हुँदा टिमवर्क राम्रो हुने बताए । योगेश गुरुङ, विमल घर्तीमगर, विशाल राई ए ले अग्रपंक्ति सम्हाल्दा देवेन्द्र तामाङले डिफेन्सलाइनको कमान्ड सम्हाल्ने कटुवालले बताए ।

यता मानेभञ्जाङका टिम व्यवस्थापक तेन्जीङ भुटिया पनि आफ्नो टिमले सकरात्म नतिजा निकाल्नेमा आशावादी रहेको बताए । ‘खेल ५०–५० प्रतिशत हो । हाम्रो टिममा भारतिय अन्डर १४ र १६ वर्षको राष्ट्रिय टिमबाट खेलिसकेको खेलाडीहरु रहेका छन् नतिजा राम्रो होला आशावादीछु,’ भुटियाले भने,’सिलोङ फुटबल क्लबका चर्चीत खेलाडी लियो र न्युकरको तालमेल मिल्यो भने खेल जित्न सकिन्छ ।’

लिग च्याम्पियन मछिन्द्रसहित ए डिभिजनका ३ क्लब त्रिभुवन आर्मी क्लब, संकटाको सहभागिता रहेको प्रतियोगितामा १० टोलीको सहभागिता रहेको छ । माइ भ्याली फुटबल क्लबको आयोजनामा जारी प्रतियोगितामा शनिबारदेखि क्वार्टरफाइनल खेल सुरु हुनेछ । फागुन २४ गते सम्म चल्ने गोल्डकपको विजेताले ८ लाख र दोस्रो हुने टोलीले ५ लाख रुपैयाँ प्राप्त गर्नेछ ।