दिपक बोहोरा, इलाम

माइभ्याली गोल्ड कप फुटबल प्रतियोगिताको छैटौं संस्करणको उपाधिको लागी आयोजक टोली र सहिद स्मारक ए डिभिजन लिग च्याम्पियन सानमिगेल मछिन्द्र क्लबबीच प्रतिस्पर्धा हुँदैछ ।

इलाम स्थित ठूलो टुडिखेलमा हुने फाइनल खेलमा दुवै टोलीमध्ये जो विजयी बनेपछि माइभ्यालिमा पहिलो पटक च्याम्पियन बन्नेछ । फाइनलका लागि दुवै टोलीका प्रशिक्षकले तयार रहेको बताएका छन् । फाइनल दिउँसो ३ः०० बजे सुरु हुनेछ ।

लिगपछि झापामा सताक्षी गोल्डकप जितेको मछिन्द्र माइभ्यालीको सेमिफाइनलमा भारतको माने भञ्जाङ फुटबल क्लबलाई हराएको थियो । आयोजक माइभ्यालीले भने लिगको दोस्रो टोली त्रिभुवन आर्मी क्लबलाई सडनडेथमा हराउँदै फाइनल यात्रा तय गरेको थियो ।

मछिन्द्रलाई घरेलु दर्शक मैदानविरुद्ध खेल्न केहि कठिन हुन सक्छ । आयोजक टोलीले पनि स्टार खेलाडी हेबिवेट टोलीको दवाब महसुस गर्न सक्नेछ । लिग च्याम्प्यिनविरुद्ध अन्य क्लबका खेलाडी समेटेर आयोजक टोलीले चुनौति पेश गर्नेछ ।

जावलाखेल युथ क्लबका विशाल तामाङ, फ्रेन्डस क्लबका देव लिम्बु र ब्रिगेड ब्वाइज क्लबका शिशिर लेखी लगायतको खेलाडीहरु समेटेर टोली बनाएको आयोजक पहिलो पटक उपाधि घरमै राख्न प्रयासरत छ ।

‘फाइनलमा प्रेसरमा हुन्छ । त्यहि माथि घरेलु टिमलाई हराउन सजिलो हुन्न, मछिन्द्रका प्रशिक्षक प्रवेश कटुवालले भने, फाइनल खेल ५०–५० को हो । सोचे जस्तो टोलीको प्रर्दशन भयो भने उपाधि जित्न सक्छौं । घरेलु मैदान र दर्शकमा कुनै दबाब नभएको आयोजक टोलीका प्रशिक्षक दर्शन राजभक्त बताए ।

विभिन क्लबका अनुभवी खेलाडीको समिश्रणमा टोली तयार पारेकोले उपाधि जित्ने उनले विश्वास व्यक्त गरे । गोल्डकपको विजेताले ८ लाख र दोस्रो हुने टोलीले ५ लाख रुपैयाँ प्राप्त गर्नेछ ।