एजेन्सी – यो सिजनको इंग्लिस प्रिमियर लिग उत्तरार्धमा रहँदा लिभरपुललाई च्याम्पियन बन्न मात्रै दुई जितको खाँचो थियो । सोमबार राति एभर्टनविरुद्धको तय भएको खेल सम्भव भएको भए र जित हात पारेको अवस्थामा लिभरपुल उपाधिबाट एक जित टाढा हुने थियो ।

तर, विश्वव्यापी रुपमा फैलिएको कोरोना भाइरस (कोभिड–१९) का कारण विश्वमा खेलकुद गतिविधि नै ठप्प बनेको छ । यसमा इंग्लिस प्रिमियर लिग पनि रहेको छ । प्रिमियर लिग आयोजकले ३ अप्रिलसम्मको खेल स्थगित गरिसकेको छ । यस्तोमा लिभरपुलको उपाधि यात्रासमेत लम्विएको छ । यो अवधिका लिभरपुलले एभर्टन र क्रिस्टल प्यालेससँग खेल्ने तालिका थियो । कोरोना भाइरको त्रास नभएको भए लिभरपुल २१ मार्चमा सम्भवत ३० वर्षपछि प्रिमियर लिग च्याम्पियन बन्ने थियो ।

तर, खेल नै स्थगित भएपछि लिभरपुलको उपाधि यात्रासमेत लम्विएको छ । लिगको २९औं चरणको खेल सुरु हुदा लिभरपुलले दोस्रो स्थानको म्यानचेस्टर सिटीलाई २५ अंकले पछि पारेको छ । भनौ आरामदायी अग्रता बनाएको छ । यही अवस्थामा लिगका बाँकी खेल हुने नहुने अझैपनि भन्न सकिने अवस्था रहेको छैन । तर, यसबारे प्रिमियर लिग आयोजकले केही ठोस निर्णय पक्कै निकाल्ने छ ।

केही बेलयाती सञ्चार माध्यमले अबको बाँकी खेल हुन नसकेको अवस्थामा लिभरपुलाई यो सिजनको च्याम्पियन घोषणा गर्ने र यसवर्ष रेलिगेसन नहुने शर्त अघि सारेको छ । उनीहरुका अनुसार यो सिजन प्रिमियर लिगमा बढुवा हुने दुई क्लबसहित अर्काे वर्ष २२ टोलीलाई प्रतिस्पर्धा गराउने र ५ क्लबलाई रेलिगेसन गर्नुपर्ने समेत तर्क रहेको छ ।

४ अप्रिलपछि पनि खेल हुन नसकेको अवस्थामा लिभरपुललाई उपाधि दिइने तयारी भइसकेको छ । तर, यसका लागि कम्तीमा पनि १४ क्लबको बहुमत आवश्यकता रहेको प्रियिमर लिगको बैठकले यस्तो निर्णय गरेको छ ।

टेलिग्राफका अनुसार दोस्रो स्थानमा रहेको म्यानचेस्टर सिटीभन्दा २५ अंकको अग्रता बनाएको लिभरपुललाई च्याम्पियन बनाउने आन्तरिक तयारी भएको हो । तर, अब लिभरपुलले उपाधिका लागि १४ अन्य क्लबको बहुमत आवश्यक रहेको छ । १४ क्लबको बुहमत भएमा लिभरपुलले ३० वर्षपछि प्रिमियर लिगको उपाधि जित्नेछ । प्रिमियर लिगमा २० क्लब रहेको छ ।