एजेन्सी – स्पेनिस महारथी रियल म्याड्रिडले आउदो समर सिजनमा नर्वे तथा जर्मन क्लब बोरुसिया डर्टमन्डका युवा स्टार अर्लिङ ब्राउट हालान्डलाई अनुबन्ध गर्ने प्रयास थाल्ने भएको छ । 

सन् २०१८ मा सदावहार फरवार्ड क्रिस्टियानो रोनाल्डोले क्लब छाडेयता, रियलले रोनाल्डो जस्तै किलर फरवार्ड भेट्न सकेको छैन । स्पेनिस पत्रिका मार्काका अनुसार अब रियलमा रोनाल्डोको विकल्पको रुपमा हालान्ड हुन सक्ने र त्यसका लागि रियलले हालान्डलाई मोटो रकम खर्चन सक्ने उल्लेख गरेको छ ।

रोनाल्डो नहुदा रियलले फ्रान्सेली फरवार्ड करिम बेन्जेमा र वेल्सम्यान ग्यारेथ बेल र नयाँ फरवार्डको रुपमा लुका जोभिकलाई अनुबन्ध गरेपनि उनीहरुको प्रदर्शन सोचे अनुरुपको हुन सकेको छैन । रियल यो सिजन गोलकै लागि संघर्ष गरिरहेको छ ।

मारियानो डियाजलाई फिर्ता बोलाएपनि उनले पनि प्रशिक्षक जिनेदिन जिदानको मन जित्न सकेको छैन । तर, यो सिजन कमै मौका पाएको मारियानो डियाजले सिजनको दोस्रो ‘एल क्लासिको’ मा बार्सिलोनाविरुद्ध २–० को जित निकाल्दा मैदान छिरेको पहिलो मिनेटमै गोल गर्न सफल भएका थिए ।

रियलले अब ग्यारेथ बेल र लुका जोभिकको विकल्पबारे छलफल गरिसकेको मार्काले जनाएको छ । बेन्जेमाले यो सिजन ७ खेल खेलदा १ गोल मात्रै गरेका छन् । त्यसैले हालान्ड नै अब रियलको पहिलो लक्ष्य हुनेछ । उनले यो सिजन विन्टरमा डर्टमन्ड आएयता ११ खेलमा १२ गोल गर्दै आफ्नो क्षमता देखाइसकेका छन् । १९ वर्षीय हालान्ड गत जनवरीमा अष्ट्रियन क्लब रेडबुल साल्जवर्गबाट डर्टमन्ड आएका थिए ।

डर्टमन्डले हालान्डलाई बेचेर मोटो रकम कमाउन सक्नेछ । ६३ मिलियन पाउन्डमा डर्टमन्ड पुगेका हालान्डको मुल्य ९४ मिलियन रहेको छ । १९ वर्षीय हालान्डको रिलिज क्लब ६३ मिलियन पाउन्ड रहेको छ । त्यसैले डर्टमन्डले हालान्डलाई छोड्न सक्नेछ ।

हालान्डका एजेन्ट मिनो राइओलाले हालान्डले आउदो समरमा जर्मनी छाड्न नसोचेको र म्याड्रिड आउनु आफ्नै लागि महत्वाकाङ्क्षा हुन सक्ने मार्कालाई बताएका छन् ।

जिदानले अझै पनि बेन्जेमालाई विश्वास गर्दै उनको पार्टनरको रुपमा हालान्डलाई प्रयोग गर्ने मनसाय बनाएको छ । इन्टर मिलानका लोउटारो मार्टिनेज र आरबी लाइप्जिगका टिमो वेर्नर पनि रियलको विकल्पमा रहेपनि रियलले अहिले हालान्डलाई नै चाहेको छ । नेयमार जुनियर, केलियन एमबाप्पे पनि रियलको अनुबन्धको सुचीमा रहेको छ ।

एमबाप्पेले अझै एक वर्ष पीएसजीमा सम्झौता गर्ने बताइरहँदा अनुबन्ध रियललाई असम्भव जस्तै देखिएको छ । नेयमार अर्काे विकल्पमा रहेपनि उनको व्यवहारका कारण पछि हटेको अनुमान गरिएको छ ।

रियल ला लिगाको दोस्रो स्थानमा छ । रियल बार्सिलोनासँग २ अंकले पछि परेको छ । विश्वव्यापी बनेको कोरोना भाइरस (कोभिड–१९) का कारण विश्व खेलकुद नै ठप्प छ । रियल च्याम्पियन्स लिगको प्रि–क्वाटरफाइनलमा इंग्लिस क्लब म्यानचेस्ट सिटीसँग २–१ ले पछि परेको छ ।