हाम्रो खेलकुद काठमाडौं, भदौ १७ –

पुनरावेदन पाटन अदालतले अखिल नेपाल फुटबल संघ (एन्फा) को साधारण सभाका विषयमा भदौ २३ गते अन्तिम फैसला सुनाउने भएको छ।

बुधबारका लागि तय भएको साधारण सभा रोक्न मंगलबार आन्तरिम आदेश गरेको पुनरावेदनले बिहीबार छलफलका लागि दुवै पक्षलाई बोलाएको थियो । अन्तरिम आदेशलाई निरन्तरता दिनु पर्ने नपर्ने विषयमा छलफल गर्न पुनरावेदनले डोकेको हो । दुवै पक्षले आफ्नो भनाई राखेपछि अदालतले अन्तरिम आदेशलाई निरन्तरता दिदै अर्को साता निर्णय सुनाउने भएको हो ।

एन्फाकै उपाध्यक्षद्वय कर्मा छिरिङ शेर्पा, विजयनारायण मानन्धर र सदस्य पंकज नेम्बाङको उजुरीमा पुनरावेदनले साधारण सभा रोक्न अन्तरिम आदेश जारी गरेको थियो । बिहान ११ देखि झन्डै ५ घन्टा चलेको बहसमा वादीकातर्फबाट उपेन्द्रकेशरी न्यौपाने, हिरा रेग्मी र शेरबहादुर केसी तथा प्रतिवादीकातर्फबाट शुसिल पन्त, शम्भु थापालगायत ५ जना वकिलले बहस गरेका थिए ।

एन्फा र उजुरीकर्ता पक्षले एन्फाको अलग अलग विधान पेश गरेपछि पुनरावेदनले त्यसमा पनि २३ गते छलफल गर्ने भएको छ । एन्फाले २०७० कात्तिक ७ गते साधारण सभाले अनुमोदन गरेको र अर्को पक्षले राष्ट्रिय खेलकुद परिषद् (राखेप) मा एन्फाले विगतमा दर्ता गरेको विधान प्रस्तुत गरेको थियो ।