एजेन्सी – मिडफिल्डबाट आफ्नो करीअर अगाडी बढाएका काई हाभर्टज पछिल्लो समय बायर लेभरकुसनको आक्रमण सम्हाल्दै आएका छन् । राष्ट्रिय टोलीका समेत नियमित सदस्य रहेका काईले आक्रमणमा झनै राम्रो प्रदर्शन गर्दै आएका छन् ।

त्यसो त उनको प्रतिभाबारे निर्क्यौल गर्न राष्ट्रिय टोलीका प्रशिक्षक जोकिम लोकै भनाइ पर्याप्त छ । सन् २०१८ मा मात्र १९ वर्षको छँदा काईले राष्ट्रिय टोलीमा पहिलो अवसर पाएका थिए । उनले प्रशिक्षणमा गरेको प्रदर्शनले लो लगायत उनको प्रशिक्षण टोली नै आश्चर्यमा पर्यो ।

‘जब काईले पहिलो पटक सिनियर टोलीमा रहेर प्रशिक्षण गरे । म लगायत हाम्रो प्रशिक्षण टोली अचम्ममा पर्यौं । मलाई लाग्यो की उनी अहिलेभन्दा १-२ वर्ष अघिदेखि नै हामीसँग रहन सक्थे,’ प्रशिक्षक लोले भने, ‘यस्तो लाग्थ्यो की उनी लामो समयदेखि राष्ट्रिय टोलीका खेलाडीसँग खेलिरहेका थिए । कुनैपनि खेलाडीमा यो स्तरको क्षमता पाउन निकै मुस्किल पर्छ ।’

काईले शुक्रबार राती भएको खेलमा फ्राईबर्गविरुद्ध १-० को जितमा निर्णायक गोल गरेका थिए । यससँगै जर्मन लिगको शीर्ष श्रेणीमा उनको गोल संख्या ३५ गोल पुग्यो । २१ औं जन्मदिन अघि यो आँकडा पुर्याउने काई पहिलो खेलाडी हुन् । जारी सिजन नै उनले ११ गोल गरिसकेका छन् । कोरोनापछि लिग सुचारु भएपछि नै उनले ४ गोल गरिसकेका छन् ।

काईले गत सिजन उत्कृष्ट प्रदर्शन गर्दै ३४ खेलमा १७ गोल गरेका थिए । उनले अधिकांश खेल फरवार्डपछाडी नम्बर १० पोजिसनमा खेलेका थिए । कोरोना संक्रमणले स्थगित लिग सुचारु भएपछि भने क्लबका फरवार्ड केभिन भोलान्डको अनुपस्थितिमा काईले फल्स ९ भूमिकामा आक्रमण सम्हालेका छन् । भोलान्ड क्लबका मुख्य फरवार्ड मात्र नभएर केहि खेलमा कप्तानी पनि गर्दथे ।

काईले कोरोनापछि अग्स्बर्गविरुद्ध खेलमा आक्रमण त सम्हाले नै, २-० को उक्त जितमा उनले टोलीको कप्तानी पनि गरेका थिए । २० वर्षीय काई सन् २००५ मा लुकास पोडोल्स्कीपछि कप्तानी गर्ने सबैभन्दा कान्छा खेलाडी बने । उनले उक्त खलेको पहिलो गोलमा असिस्ट पनि दिएका थिए ।

काईलाई अनुबन्ध गर्ने दौडमा युरोपका ठूला टोली लागिपरेका छन् । इंग्लिस टोली म्यानचेस्टर सिटी, लिभरपुल तथा क्याटलान क्लब बार्सिलोनाले उनलाई नजिकबाट हेरिरहेका छन् । लेभरकुसनले उनको लागि कम्तिमा १ सय मिलियन युरो माग गर्ने अनुमान गर्न सकिन्छ । तर कोरोनाका कारण आर्थिक अवस्था कमजोर रहेका कारण बार्सिलोनाले खेलाडी साटफेरमार्फत उनलाई अनुबन्धन गर्ने प्रयास गर्न सक्नेछ ।

काईले उमेर समूहदेखि नै बायर लेभरकुसनबाट खेल्दै आएका छन् । उनले सिनियर टोलीका लागि झन्डै डेढ सय खेल खेलिसकेका छन् । यसक्रममा उनी अहिले नै ५० गोलनजिक पुगेका छन् । सन् २०१९ मा अर्जेन्टिनाविरुद्ध मैत्रीपूर्ण खेलमा गोल गर्दै राष्ट्रिय टोलीका लागि पनि गोलको खाता खुलेको छ । जर्मन लिगमा उदाएका यी प्रतिभा आउने सिजन अर्को क्लबको जर्सीमा खेल्ने सम्भावना प्रशस्त छ । तर जहाँ पुगेपनि उनको शैलीले प्रभाव छाड्ने अनुमान गर्न सकिन्छ ।