काठमाडौं (हाम्रो खेलकुद) – अखिल नेपाल फुटबल संघ (एन्फा)ले कोरोनाका कारण मारमा परेका फुटबलसँग समबन्धित संस्था र व्यक्तिलाई राहत प्रदान गर्न झन्डै १ करोड रुपैयाँ भन्दा बढीको बजेट तयार पारेको छ ।

एन्फा महासचिव इन्द्रमान तुलाधर

कोरोना संक्रमणलाई रोक्न सरकारले २ महिना भन्दा लामो समयदेखि लकडाउन गरेका कारण उत्पन्न कठिन परिस्थितिले फुटबलसँग सम्बन्धित राष्ट्रिय खेलाडी, रेफ्री, प्रशिक्षक, कर्मचारी, जिल्ला तथा क्लबहरुलाई राहत दिने निर्णय गरेको हो । एन्फाले विभिन्न क्षेत्रलाई समेटेर पारेको अनुमानित बजेटमा आवश्यकताअनुसार हेरफेर हुन सक्ने संघका महासचिव इन्द्रमान तुलाधरले बताएका छन् ।

राहतको सिफारिसका लागि एन्फाले केन्द्रिय सदस्य रत्नकुमार श्रेष्ठ संयोजक रुपेश अधिकारी र उत्तमराज भण्डारी सदस्य रहेको राहत वितरण समिति गठन गरेको थियो । समितिले अध्ययन गरेर गरेको सिफारिसका आधारमा एन्फाको सोमबार बसेको अनलाइन कार्यसमिति बैठकले राहत रकम अनुमोदन गरेको थियो ।

एन्फाले आफुमातहतका सम्बन्धित सबैलाई गरि १ करोड २० लाख रुपैयाँ भन्दा बढी राहत बाढ्न लागेको हो । फिफाबाट स्वीकृत भएपछि मात्र राहत उपलब्ध गराइने एन्फाका महासचिव तुलाधरले जानकारी दिए । यद्यपि प्रस्ताव गरिएको बजेट अनुसार विभिन्न क्षेत्रका संस्थाले आवश्यक नपरेको कारण राहत नलिने र कुनै क्षेत्रमा भने अति प्रभावित भएका कारण बजेट थप गर्नुपर्ने अवस्था आउन सक्छ । यसका लागि संघले विस्तृत जानकारी लिएपछि बजेट मिलान गर्न सकिने तुलाधरले बताएका छन् ।

‘हामीले अहिले सबै क्षेत्रलाई समेटेर बजेट अनुमानित बनाएका हौँ । यसले सबै क्षेत्र समेटिने आशा हामीले गरेका छौँ । तर यो नै अन्तिम विन्दु भने होइन, आवश्यकता अनुसार शीर्षक अनुसार बजेट फरक पनि हुन सक्छ,’ उनले भने,’ केहि जिल्ला र क्लबहरुले राहतको आवश्यकता नरहेको जानकारी दिएका छन् । त्यसबाट बचेको रकम अर्को क्षेत्रमा खर्च गर्न सकिनेछ ।’ तुलाधरले फिफाकै सल्लाहमा १ लाख अमेरिकी डलरको आसपासमा राहत उपलब्ध गराउन लागिएको बताए ।

एन्फाले आफु मातहतका ४८ जिल्ला, ए डिभजनका १४ क्लब, बी डिभिजनका १२ क्लब र सी डिभिजनका १४ क्लबलाई समान ७५ हजारको दरले राहत उपलब्ध गराउने तयारी गरेको छ । तुलाधरका अनुसार केहि ए डिभिजन क्लब र जिल्लाले कोरोनाले प्रभावित नभएकाले रकम नलिने जानकारी दिइसकेको बताए ।

एन्फाका ४ सदस्य समिति (प्रशिक्षक, खेलाडी, महिला र रेफ्री) लाई पनि समान रुपमा राहत वितरण गरिनेछ । त्यस्तै एन्फाबाट स्वीकृति मोफसलमा सञ्चालन गर्ने फुटबल प्रतियोगिता आयोजक क्लबलाई प्रति क्लब ७५ हजार रुपैयाँ दिने निर्णय भएको छ । त्यस्तो क्लबको संख्या झन्डै ३० वटा रहेको एन्फा महासचिव इन्द्रमान तुलाधरले बताए ।

‘ मोफसलका प्रतियोगिताका लागि हामीले ३० क्लबको संख्या राखेका छौं । तर सबै दावीमा हामीले विस्तृत अध्ययन गर्नेछौं । कोरोनाका कारण नै प्रतियोगितामा केहि असर परेको छ वा छैन निर्क्यौल गरेपछि मात्र राहत दिनेछौं,’ उनले भने ।

रेफ्रीहरुको हकमा भने तुलाधरले दुई तर्फबाट सहयोग गर्न लागिएको बताए । ‘ ए डिभिजन लिग खेलाउने रेफ्रीहरुलाई हामीले केन्द्रबाट नै राहत दिनेछौं । अन्य बी डिभिजन र जिल्लाका रेफ्रीहरुलाई भने रेफ्री समितिमार्फत राहत दिनेछौं । रेफ्री संघले यसअघि पनि आफैं आवश्यक परेकालाई राहत दिँदै आएको छ । समयसँगै यो संख्या बढ्ने हामीले बुझेका छौँ । प्रभावित सबैलाई हामीले विवरण माग गरेर अध्ययन थालेका छौं,’ उनले भने,’ फुटबलबाट नै जीविकोपार्जन गर्दै आएका रेफ्रीलाई सहयोग गर्नु नै हाम्रो मुख्य उद्देश्य हो । अधिकांश जिल्लामा रेफ्रीलाई पार्ट-टाइमका रुपमा गर्ने धेरै छन् । त्यसैले पनि ए डिभिजन खेलाउने व्यावसायिक रेफ्रीलाई केन्द्रबाट सिधै र अन्यलाई संघमार्फत सहयोग गरिनेछ ।’

एन्फाले आफ्ना १ सय ५० कर्मचारी, शनिबारको प्रशिक्षण सञ्चालन गर्ने २४ प्रशिक्षक, ३० रेफ्री र रेफ्री एसेसरलाई जनही १० हजार रुपैयाँका दरले राहत प्रदान गरिने बताइएको छ । फिफाले स्वीकृति दिने वित्तिकै राहत वितरण सुरु हुने पनि महासचिव तुलाधरले जानकारी दिए । यसबाहेक पूर्व राष्ट्रिय खेलाडी र फुटबलसँग सम्बद्ध कोरोनाबाट प्रभावित जोकोहीले आफ्नो विवरण पेस गरेर एन्फामार्फत राहत लिन सक्नेछन् ।

‘ यो निकै कठिन परिस्थिति हो । हामीले राहत दिने भनेको आवश्यक परेकालाई हो । जसले फुटबललाई आफ्नो जिविकोपार्जन गर्ने माध्यम बनाउनुभएको छ वहाँहरुलाई कठिन नहोस । रेफ्री, खेलाडी, पूर्वखेलाडी यदि कसैलाई समस्या परेको छ भने हाम्रो संघ र अन्य समितिमार्फत विवरण पेस गर्न अनुरोध गर्दछौं,’ तुलाधरले भने ।

फिफाले कोभिड १९ कै कारण निर्धारित समय अघि नै ५ लाख अमेरिकी डलर आफ्ना सदस्य राष्ट्रलाई पठाइसकेको छ । त्यसबाहेक नेपाललाई भने गत वर्षको महिला लिगको रोकिएको रकम र यस आर्थिक वर्षको महिला लिग गरेर थप १ लाख अमेरिकी डलर समेत पठाइसकेको तुलाधरले बताए । फिफाले स्वीकृति गर्नेबितिकै अन्य शीर्षकमा आएको रकम भएपनि कोरोना राहतमा वितरण गर्न सकिनेछ ।

एन्फाले राहतको लागि तयार पारेको अनुमानित विवरण :

– ४८ जिल्ला संघ प्रति जिल्ला ७५ हजार रुपैयाँ (कुल-३६ लाख रुपैयाँ)

– ४ सदस्य समिति, प्रति समिति ७५ हजार (कुल- ३ लाख रुपैयाँ)

– १४ ए डिभिजन क्लब, प्रति क्लब ७५ हजार रुपैयाँ (कुल – १० लाख ५५ हजार रुपैयाँ)

– १२ बी डिभिजन क्लब, प्रति क्लब ७५ हजार (कुल – ९ लाख रुपैयाँ)

– १४ सी डिभिजन क्लब, प्रति क्लब ७५ हजार (कुल – १० लाख ५० हजार रुपैयाँ)

– एन्फाबाट स्वीकृति मोफसलका ३० प्रतियोगिता आयोजन समिति, प्रति क्लब ७५ हजार (कुल – २२ लाख ५० हजार रुपैयाँ)

– शनिबारिय प्रशिक्षक २४, जनही १० हजार रुपैयाँ (कुल – २ लाख ४० हजार रुपैयाँ)

– एन्फा कर्मचारी १५०, जनही १० हजार रुपैयाँ (कुल – १५ लाख रुपैयाँ)

– रेफ्री/रेफ्री एसेसर ३० जना, जनही १० हजार (कुल- ३ लाख रुपैयाँ)

– राष्ट्रिय खेलाडी महिला/पुरुष ७० जना, जनही १५ हजार रुपैयाँ (कुल – १० लाख ५० हजार रुपैयाँ)

जम्मा राहत वितरण रकम – १ करोड २२ लाख ४० हजार रुपैयाँ