एजेन्सी – युरोपियन फुटबल महासंघ (युइएफए)ले युइएफए च्याम्पियन्स लिगका बाँकी रहेका आठ खेलहरु ११ दिनमा पोर्चुगलको लिस्वनमा सम्पन्न गर्ने योजना बनाएको छ ।

यो आधिकारिक निर्णय भने होइन । तर, बुधबार हुने युइएफएको बोर्ड बैठकमा यो प्रस्ताव पेस गरिनेछ । जसमा धेरै सदस्यहरु सहमत हुने बुझिएको छ । युइएफएका एक पदाधिकारीका अनुसार यो प्रस्तावमा सबैजना सहमत हुने देखिएका छन् ।

यसअघि यो सिजनको च्याम्पियन्स लिगको फाइनल टर्कीको इनतानबुलमा खेलाउने तालिका रहेपनि असम्भव भएको हुँदा २०२१ को फाइनल खेल इस्तानबुलमा खेलाइने छ । गत मार्चमा कोरोना भाइरसका कारण स्थगित भएको च्याम्पियन्स लिग र युरोपा लिगका अन्तिम १६ का बाँकी रहेका खेलहरु तोकिएको मैदानमा हुनेछन् ।

त्यसपछि यसपटक प्रतियोगिताको ढाँचा नै परिवर्तन गरि खेलाइनेछ । जसमा क्वाटरफाइनलबाट एउटा लेग मात्र खेल हुनेछ । यसअघि होव एण्ड अवेमा हुँदै आएकोमा अब एउटा खेलबाट नतिजा छिनोफानो हुनेछ ।

१२ अगष्ट देखि १५ अगस्टसम्म क्वाटरफाइनल, १८ र १९ अगस्टमा सेमिफाइनल र २३ अगसटमा फाइनल खेलाउने योजना छ । सबै खेल लिस्वनमा नै हुनेछ ।

खेलहरु लिस्वनको दुई फरक (बेन्फिका र स्पोर्टिङ लिस्वन) को मैदानमा हुनेछ । यो योजना अबलम्बन गर्दा प्रतियोगितामा ६ खेल कम हुनेछ । बन्द रंगशालामा हुने भनिएपनि पोर्चुगल सरकारले स्वीकृति दिएमा केहि प्रतिशत दर्शक राखिने युइएफएले जनाएको छ ।

फ्रेन्च क्लब पेरिस सेन्ट जर्मेन (पीएसजी), इटालियन क्लब एटलान्टा, स्पेनिस क्लब एट्लेटिको मड्रिड र जर्मन क्लब आरबी लाइप्जिग क्वाटरफाइनलमा प्रवेश गरेका छन् ।

इंग्लिस क्लब म्यानचेस्टर सिटी र स्पेनिस क्लब रियल म्याड्रिड (१–२), इंग्लिस क्लब चेल्सी र जर्मन क्लब बायर्न म्युनिख (०–३), इटालियन क्लब युभेन्टस र फ्रेन्च क्लब लियोन (०–१) तथा स्पेनिस क्लब बार्सिलोना र इटालियन क्लब नेपोली (१–१) बीच प्रि–क्वाटरफाइनलको दोस्रो लेगको खेल बाँकी रहेका छन् । प्रि–क्वाटरफाइनलका बाँकी रहेका चार खेलहरु ७ र ८ अगस्टमा तोकिएको मैदानमा हुनेछन् ।

युरोपा लिगका बाँकी रहेका खेल पनि यही पद्धतिमा हुनेछन् । युरोपा लिग अगष्ट १० बाट जर्मनीमा खेलाइने तयारी भएको छ । त्यसअघि प्रि–क्वाटरफायनलका दोस्रो लेगका बाँकी खेल हुनेछन् ।