काठमाडौं (हाम्रो खेलकुद)– छानविन समितिको प्रतिवेदनका आधार देखाउँदै अखिल नेपाल फुटबल संघ (एन्फा) ले मंगलबार भक्तपुर जिल्ला फुटबल संघलाई पूर्न गठन गरेको छ । अध्यक्ष कर्मा छिरिङको अध्यक्षमा मंगलबार बसेको एन्फा कार्यसमितिको आपकालिन बैठकले किशोर हेक्काको अध्यक्षतामा १३ सदस्यीय भक्तपुर जिल्ला तदर्थ समिति गठन गरेको हो ।

एन्फाले विज्ञप्ती जारी गर्दै कोभिड १९ का कारण सरकारले गरेको लकडाउनको पूर्ण रुपमा अन्त्य भए पश्चातको ६ महिना भित्रको कार्यदेश रहने गरि तदर्थ समिति गठन गरेको उल्लेख गरेको छ । तदर्थ समितिको उपाध्यक्षमा अनिल हेक्का, विकास थापा छन् भने सदस्यमा प्रविण लाखेमरु, राजेश श्रेष्ठ, रोशन श्रेष्ठ, हरिकृष्ण सहकल, रामुकार लोहला, रुपेश धौवन्जार, सुरेन्द्र भाषिमा, सुरेन्द्र प्रजापति, कृष्णचन्द्र चक्रधर र सुमन थापा छन् ।

गौतम सुजखुको अध्यक्षमा रहेको कार्यसमितिलाई एन्फाले कारवाही गर्नुपर्ने थ्रुपै कारण उल्लेख गरेको छ । २०७६ साउन १४ गते आपतकालिन समितिको बैठकबाट गठित छानविन समितिले दिएको प्रतिवेदनको आधारमा कारवाही गरेका जनाएको छ । एन्फाको निर्देशन नियमावली र कानुनी प्रक्रिया समेतको उल्लंघन गरि जिल्ला लिग समेत सञ्चालन गरेको, विधान अनुसार क्लब दर्ता नभएको र क्लब संख्या समेत नपुर्याई जिल्ला संघको गतिविधि सञ्चालन गरेको पाइएकाले एन्फाले जारी गरेको विज्ञप्तीमा उल्लेख छ ।

त्यस्तै क्लब दर्तामा कानुनी प्रक्रिया पुरा नगरेको, टिम दर्ता एवंम नविकरण नगरेको, आफु अनुकुलको रकम उल्लेख गयर निर्देश र नियम विपरित तवरले रकम उठाई लिग सञ्चालन गरेको तथा जिल्ला लिग सञ्चालनमा प्रक्रियागत त्रुटी समेत रहेको पाइएको विज्ञप्तीमार्फत जनाएको छ ।

सुजखु काठमाडौं, ललितपुर र धादिङ जिल्ला अध्यक्षसँगै एन्फा र एन्फा अध्यक्ष कर्मा छिरिङका विरुद्ध विभिन्न निकायमा उजुरी गर्दै आएका छन् । कतिपयले भक्तपुर जिल्ला पूर्नगठनलाई त्यो सँग जोडेर पनि हेरेका छन् । ललितपुर जिल्ला संघका अध्यक्ष पुरुषोत्तम थापालाई पनि एन्फाले अनुसासनको कारवाही गर्दै अर्को साधारण सभा सम्मका लागि निलम्बन गरेको थियो ।

सोही बैठकले कास्की जिल्ला फुटबल संघका अध्यक्ष मिलन गुरुङका विषयमा छानविन गर्न गठित समितिको संयोजकमा वीरबहादुर खड्कालाई मनोनयन गरेको एन्फाले जनाएको छ । यसअघिका संयोजक एन्फाका केन्द्रिय सदस्य रत्नकुमार श्रेष्ठले कोभिड १९ को महामारी र व्यक्तिगत स्वास्थका कारण राजीनामा दिएकोले रिक्त पदमा खड्कालाई मनोनय गरिएको हो । अध्यक्ष गुरुङ आर्थिक मामिलामा विवादमा परेका छन् । गत वर्ष नै एन्फा कास्कीले मनोनित उपाध्यक्षलाई कार्यवहाक अध्यक्ष तोकेपनि गुरुङ नै अध्यक्षका हैसियतमा काम गर्दै आएका छन् ।

बैठकले असोजमा दशरथ रंगशालामा हुने विश्व कप छनोटका लागि जुलाई महिनाबाट राष्ट्रिय फुटबल टोलीको तयारी सुरु गर्ने पनि निर्णय गरेको छ । त्यसका लागि सम्बन्धित सबै निकायसँग सहकार्य गर्ने पनि उल्लेख गरेको छ । त्यस्तै बैठकले टासी घलेलाई पुनः एन्फाको मानार्थ अध्यक्षमा मनोनयन गरेको छ ।