काठमाडौं (हाम्रो खेलकुद)– अखिल नेपाल फुटबल संघ (एन्फा) का पूर्व केन्द्रीय सदस्य रमेश रायमाझी फरक भूमिकामा दुई वर्षपछि एन्फा फर्केका छन् । उनलाई एन्फाले लिग समितिको सह संयोजकको जिम्मेवारी दिएको छ । 

एन्फा अध्यक्ष कर्मा छिरिङ शेर्पाले मंगलबार रायमाझीलाई सह संयोजकको मनोनयन पत्र हस्तान्तरण गरेका थिए । यसअघि दुई कार्यकाल एन्फा कार्यसमिति सदस्य रहेको रायमाझी दुई वर्षअघि भएको निर्वाचनमा सदस्यमा पराजित भएका थिए ।

फरक जिम्मेवारीमा एन्फा फर्कदा खुसी लागेको जनाउँदै रायमाझीले भने, ‘म सधै एन्फा परिवार भित्रकै थिए । लामो समय फुटबलमा काम गरेको अनुभवका आधारमा पनि एन्फाले दिएको जिम्मेवारी निर्वाह गर्न प्रयास गर्नेछु । नेपाली फुटबल विकास नै हामी सबैको एक मात्र उद्देश्य हो । त्यसमा म सहयोगी हुन सक्छु भने म जुन भूमिकामा पनि काम गर्न तयार छु ।’

११ सदस्यीय लिग समितिको संयोजकमा पूर्व राष्ट्रिय खेलाडी विज्ञानराज शर्मा रहेका छन् । रायमाझीले पछिल्लो लिगमा दर्शकको संख्या घट्नु केहि निराशाजनक भएको उल्लेख गर्दै भने, ‘लिगमा कसरी दर्शक बढाउन सकिन्छ, फुटबललाई थप लोकप्रिय र व्यवासयिक बनाउनका लागि आफ्नोतर्फबाट हरसम्भव प्रयास गर्नेछु । ‘

८ वर्ष एन्फा कार्यसमितिमा रहँदा रायमाझी फुटबल समिति र अतिथि सत्कार समितिको संयोजक रहेका थिए । त्यस्तै उनले पटक पटक राष्ट्रिय टोलीको व्यवस्थापकको जिम्मेवारी पनि निर्वाह गरेका थिए ।