एजेन्सी – बोरुसिया मोन्चेनग्लाडवाकले सहज जित दर्ता गर्दै जर्मन बुन्डेस लिगाको चौथो स्थानमा उक्लदा पाडेरवर्न रेलिगेसनमा पर्ने पहिलो टोली बनेको छ ।

बोरुसिया पार्क मोन्चेनग्लाडवाकमा मंगलबार राति भएको खेलमा घरेलु वल्फ्सवर्गमाथि ३–० को जित निकाल्दै तेस्रो स्थानमा उक्लिन सफल भएको हो । मोन्चेनग्लाडवाकको जितमा जोनास हफमनले दुई तथा लार्स स्टिनडिलले एक गोल थपे । पहिलो हाफमा दुई तथा दोस्रो हाफमा १ गोल सम्भव भएको थियो ।

खेलको ११औं मिनेटमा जोनासले ब्रल इम्वोलोको पासमा गोल गर्दै घरेलु टोलीलाई अ‍ेलमा अग्रता दिलाएका थिए । ३०औं मिनेटमा म्याथियस जिन्टरको पासमा जोनासले व्यक्तिगत दोस्रो गोल गरेपछि मोन्चेनग्लाडवाकले पहिलो हाफमा २–० को अग्रता बनायो ।

६५औं मिनेटमा लार्स स्टिनडिलले गोल गर्दै मोन्चेनग्लाडवाकलाई ३–० को सहज जित दिलाए । जितसँगै तेस्रो स्थानमा उक्लिएको मोन्चेनग्लाडवाकको ३२ खेलबाट ५९ अंक पुगेको छ । मोच्नेनग्लाडवाकले एक खेल कम खेलेको बायर लिभरकुसनलाई २ अंकले पछि पारेको हो । लिभरकुसनको ५७ अंक छ । पराजित वल्फ्सवर्ग ४६ अंक जोडेर छैटौ स्थानमा यथावत छ ।

यस्तै युनियन बर्लिनसँग १–० ले पराजित भएसँगै पाडेरवर्न दुई खेल बाँकी छदै रेलिगेसनमा परेको छ । पाडेरवर्न शीर्ष डिभिजनमा बढुवा भएको पहिलो सिजन नै रेलिगेसनमा परेको हो । गत सिजन बुन्डेसलिगा २ बाट दोस्रो स्थानमा रहँदै पाडेरवर्न शीर्ष डिभिजनमा बढुवा भएको थियो ।

खेलको २७औं मिनेटमा बिन जोलिन्स्कीले गरेको आत्मघाती गोल नै बर्लिनको जितमा निर्णायक बन्यो । अब बाँकी रहेको दुई खेलमा जित हात पारेपनि पाडेरवर्नलाई शीर्ष डिभिजनमा रहिरहन पर्याप्त बन्ने छैन । पाडेरवर्नको ३२ खेलबाट २० अंक छ । जुन १७औं स्थानको वेर्डर ब्रेमेनको भन्दा ८ अंक कम हो । यस्तै फ्रेइवर्गले हेर्था बर्लिनमाथि २–१ को जित निकाल्दै महत्वपुर्ण ३ अंक जोडेको छ ।

मंगलबार राति नै बायर्न म्युनिखले वेर्डर ब्रेमेनमाथि १–० को जित निकाल्दै दुई खेल बाँकी छदै लगातार आठौंपटक जर्मन बुन्डेसलिगाको उपाधि जितिसकेको छ । १० खेलाडीमा समेटिएको बायर्नको जितमा स्टार फरवार्ड रोवर्ट लेवान्डोस्कीले गरेको गोल नै निर्णायक बन्यो ।