एजेन्सी – इंग्लिस प्रिमियर लिगमा आज राति ३०औं चरणका चार खेलहरु हुँदैछन् । शीर्षस्थानमा रहेको लिभरपुल, म्यानचेस्टर सिटी, चेल्सी र सेफिल्ड युनाइटेडले आ–आफ्ना प्रतिद्वन्द्वीसँग प्रतिस्पर्धा गर्दैछ ।

अंक तालिकाको चौथो स्थानमा रहेको चेल्सीले रेलिगेसन जोनमा रहेको एस्टन भिल्लाको भ्रमण गर्दैछ । खेल नेपाली समयअनुसार भिल्ला पार्कमा राति ९ बजे हुनेछ । घरेलु टोलीमाथि सहज जित निकाल्दै चेल्सी अंक तालिकालाई थप बलियो बनाउदै अर्काे सिजनको च्याम्पियन्स लिगको छनोटको सम्भावना बलियो राख्ने योजनमा हुनेछ ।

युवा खेलाडीले भरिएको चेल्सीका लागि ट्यामी अब्राहम, विलियन, क्रिस्टियन पुलिसिस, मासन माउन्ट, एङ्गोलो कान्टे, मार्काेस अलन्सो, एन्टेनियो रुडिगर, पेड्रो रोड्रिग्वेज र कप्तान सेजर एज्पिलिक्वेटाको साथ हुनेछ । कलुम हड्सन ओडोई, फिकायो तोमोरीले खेल्ने सम्भावना न्युन रहँदा मिडफिल्डर जर्गिन्हो प्रतिबन्धका कारण टोलीमा हुनेछैनन् ।

कोरोना महामारीका कारण मार्चमा प्रिमियर लिग स्थगित हुनु अघि चेल्सीले एभर्टनमाथि ४–० को सहज जित निकालेको थियो । सोही जितको निरन्तरता दिने दाउमा चेल्सी हुनेछ । चेल्सी २९ खेलबाट ४८ अंक जोडेर चौथो स्थानमा रहेको छ ।

यता, एस्टन भिल्ला चेल्सीलाई स्तब्ध पार्दै रेलिगेसन जोनबाट उम्कने दाउमा हुने छ । भिल्ला २९ खेलबाट २६ अंक जोडेर १९औं स्थानमा छ । चेल्सीलाई पराजित गर्न सके भिल्ला १६औं स्थानमा उक्लनेछ । हार या बराबरीले सोही स्थानमा यथावत रहनेछ ।

अन्य खेल

न्यु क्यासलविरुद्ध सेफिल्ड युनाइटेड (साँझ ६ः४५ बजे)

एभर्टनविरुद्ध लिभरपुल (राति ११ः४५ बजे)

म्यानचेस्टर सिटी विरुद्ध बर्नली (राति १२ः४५ बजे)