एजेन्सी – इटालियन च्याम्पियन युभेन्टसला बोस्नियन मिडफिल्डर मिरालेम प्यानिच क्याटलान क्लब बार्सिलोनामा अनुबन्धित भएका छन् । बार्सिलोनाले सोमबार विज्ञप्ति जारी गर्दै प्यानिचको अनुबन्धन सार्वजनिक गरेको हो ।

प्यानिचले सन् २०२०-२१ को सिजनदेखि बार्सिलोनाबाट खेल्नेछन् । उनी सिजन अन्त्य नहुन्जेल युभेन्टसकै जर्सीमा देखिनेछन् । लियोन र एएस रोमाबाट खेलिसकेका मिडफिल्डर प्यानिच लामो समयदेखि बार्सिलोनाको नजरमा थिए । ३० वर्षीय मिडफिल्डरले बार्सिलोनामा ४ वर्षको सम्झौता गरिसकेका छन् ।

बार्सिलोनाले प्यानिचलाई अनुबन्ध गर्न ६० मिलियन युरो खर्च गरेको हो । उनको प्रदर्शनको आधारमा थप ५ मिलियनसम्म युभेन्टसले प्राप्त गर्नेछ । बार्सिलोनाले आर्थिक रुपमा सबल बन्नका लागि यो साझेदारी गरेको आरोप पनि लाग्दै आएको छ । युवा आर्थरलाई युभेन्टस पठाएर अनुभवी तर उमेरले ३० वर्ष पुगेका प्यानिच अनुबन्ध गर्दा समर्थकहरु रुष्ट भएका छन् ।

यसअघि सोमबार नै क्याटलान क्लब बार्सिलोनाका मिडफिल्डर आर्थरलाई इटालियन च्याम्पियन युभेन्टसले ७२ मिलियन युरो तिरेर खरिद गरेको थियो । बार्सिलोनाको आधिकारिक वेबसाइटमा जनाएअनुसार आर्थर सिजनको अन्त्यपछि युभेन्टस जानेछन् । दुवै क्लब र खेलाडीबीच सम्झौता समेत भइसकेको छ । २३ वर्षीय आर्थरले आइतबार युभेन्टस पुगेर विस्तृत स्वास्थ्य परिक्षण गरेपछि बार्सिलोनाले ट्रान्सफरलाई आधिकारिकता दिएको हो ।

सन् २०१८ मा बार्सिलोना आएका आर्थरले क्लबका लागि कुल ७२ खेल खेले । ब्राजिलियन क्लब ग्रेमिओबाट आएका उनले लिगमा ४७, कोपा डेल रेमा १०, च्याम्पियन्स लिगमा १३ तथा स्पेनिस सुपर कपमा एक खेल खेलेका हुन् । उनले यसक्रममा चार गोले गरे ।

आर्थरले स्पेनिस क्लबमा दुई सिजन बिताउँदा दुई उपाधि जित्न सफल रहेका छन् । सन् २०१८-१९ सिजनमा बार्सिलोनाले स्पेनिस लिग र स्पेनिस सुपर कप जितेको थियो । यसपटक भने बार्सिलोना अंक तालिकामा दोस्रो स्थानमा रहेको छ ।

लिगको अन्त्य नजीकिंदै गर्दा बार्सिलोनाले रियलसँग २ अंक पछाडी रहेको अवस्थालाई नसुधारे उपाधिविहिन हुने सम्भावना रहेको छ । च्याम्पियन्स लिगमा बार्सिलोनाले नेपोलीसँग राउन्ड अफ १६ को पहिलो लेगमा १-१ को बराबरी खेलेको थियो । दोस्रो लेग अगस्टमा हुँदैछ ।

यो पनि पढ्नुहोस : आर्थर-प्यानिच साटफेरको फाइदा र बेफाइदा