एजेन्सी – स्पेनिस ला लिगाको ३४औं चरणमा आज (आइतबार) शीर्षस्थानको रियल म्याड्रिड र दोस्रो स्थानको बार्सिलोना भिन्न समयमा मैदान उत्रनेछन् ।

रियल म्याड्रिडले एथ्लेटिको क्लब बिल्बाओको भ्रमण गर्दैछ । खेल नेपाली समयअनुसार साँझ ५ः४५ बजे हुनेछ । रियलको लागि ला लिगाको बाँकी रहेको पाँच खेल मध्ये यो खेल नै निकै महत्वपुर्ण खेलको रुपमा हेरिएको छ ।

रियलले यो खेलमा जित हात पार्न सके ला लिगाको उपाधि यात्रालाई थप मजबुत पार्नेछ । त्यसैले रियल निशिचत जितको लक्ष्य लिएर घरेलु टोलीविरुद्ध मैदानमा उत्रदैछ । कोरोनापछि चोटबाट पूनरागमन गरेको बेल्जियन फरवार्ड इडेन हाजार्ड बिल्वाओविरुद्धको खेलमा उत्रने छैन । उनी अघिल्लो खेलमा पनि चोटका कारण अनुपस्थित रहेका थिए ।

बिल्वाओलाई पराजित गर्न सके रियलले शीर्षस्थानमा बार्सिलोनाको खेलअघि ७ अंकको अग्रता बनाउनेछ । हारले ४ तथा बराबरीले ५ अंकको अग्रता बनाउनेछ । कोरोनापछिको सबै ६ खेलमा शतप्रतिशत जित निकालेको रियल सोही जितलाई निरन्तरता दिने दाँउमा हुनेछ ।

कप्तान सर्जियो रामोस र क्यासमिरोले रियलको पछिल्ला जितमा निर्णायक र उच्च प्रदर्शन गरिरहेका छन् । करिम बेन्जेमा, भिनिसियस जुनियर, रोड्रिगो, मार्काे एसेन्सियो, टोनी क्रुस, लुका मोड्रिच, फेडरिको भाल्भेर्डे र मार्सेलोको प्रदर्शन पनि तारिफ योग्य नै रहेको छ । सेन्टर ब्याक राफयल भरानले खेल्नेमा शंका रहेको छ ।

यता, घरेले टोली बिल्वाओ पनि रियललाई स्तब्ध पार्ने रणनीतिमा मैदानमा उत्रनेछ । पछिल्लो पाँच खेलमा ३ जित र समान १ बराबरी र हारको नतिजा निकालेको बिल्वाओ रियललाई पराजित गर्दै अंक तालिकालाई सुधार गर्न चहान्छ । आठौं स्थानमा रहेको बिल्वाओको ४८ अंक छ । बिल्वाओका राहुल गार्सिया, इनिगो कोर्डाेवा, इनाकी विलियम्स र गोलरक्षक युनाइ सिमोन रियलका लागि बाधक बन्न सक्नेछ । ३३ खेलबाट रियलको ७४ अंक छ ।

अन्य खेल

स्पान्योलविरुद्ध लेगानेस (राति ८ः४५ बजे)

ओसासुनाविरुद्ध गेटाफे (राति ११ः१५ बज)

भिल्लारियलविरुद्ध बार्सिलोना (बिहान १ः४५ बजे)

यो पनि पढ्नुहोस : बार्सिलोना र भिल्लारियल खेल्दै