एजेन्सी – इंग्लिस प्रिमियर लिगमा आज राति ३४औं चरणको विभिन्न तीन खेलमा प्रतिस्पर्धा हुँदैछ । तेस्रो स्थानमा रहेको लेस्टर सिटीले आर्सनलसँग प्रतिस्पर्धा गर्दा चौथो स्थानमा रहेको चेल्सीले क्रिस्टल प्यालेसको तथा वाट्फोर्ड र नर्विच सिटीबीच पनि आज राति नै प्रतिस्पर्धा हुँदैछ ।

चेल्सी र क्रिस्टल प्यालेसबीचको खेल नेपाली समयअनुसार १०ः४५ बजे शुरु हुनेछ । क्रिस्टल प्यालेसलाई पराजित गर्दै चेल्सी लेस्टरको खेलअघि सम्म शीर्ष तीनमा उक्लने दाँउमा हुनेछ । क्रिस्टल प्यालेस पनि चेल्सीलाई पराजित गर्दै ११औं स्थानमा उक्लने दाँउमा हुनेछ । प्यालेस ४२ अंक जोडेर १४औं स्थानमा रहेको छ ।

यस्तै अर्काे खेलमा आर्सनलले लेस्टर सिटीलाई घरेलु मैदानमा आतिथ्यता गर्दैछ । खेल राति १ बजे हुनेछ । सातौं स्थानमा रहेको आर्सनल लेस्टरलाई पराजित गर्दै अंक तालिका सुधार गर्दै छैटौ स्थानमा उक्लने दाँउमा रहँदा लेस्टर दोस्रो स्थानको म्यानचेस्टर सिटीसँगको अंक दुरी छोट्याउने अभियानमा हुनेछ । लेस्टरको ५८ तथा आर्सनलको ४९ अंक रहेको छ ।

यस्तै अर्काे वाट्फोर्डले रेलिगेसनको संघारमा रहेको नर्विच सिटीसँग प्रतिस्पर्धा गर्दैछ । खेल वाट्फोर्डको मैदानमा राति  १०ः४५ बजेपछि हुनेछ । वाट्फोर्ड नर्विचलाई हराउदै रेलिगेसन बच्ने दाउँमा रहँदा नर्विच पनि वाट्फोर्डलाई हराएर रेलिगसेसनको दवाव कम गर्ने लक्ष्यमा हुनेछ ।

वाट्फोर्ड २८ अंक जोडेर रेलिगेसन जोनभन्दा एक स्थान माथि १७औं स्थानमा रहँदा नर्विच सिटी २१ अंक जोडेर पुछारमा छ । नर्विचले यो खेल गुमाए रेलिगेसनमा पर्नेछ ।