एजेन्सी – स्पेनिस ला लिगामा एट्लेटिको मड्रिड सेल्टा डि भिगोसँग बराबरीमा रोकिएको छ । अग्रता जोगाउन नसक्दा एट्लेटिको सेल्टासँग १–१ गोलको बराबरीमा रोकिदै अंक बाड्न बाध्य बनेको हो ।

सेल्टाको मैदानमा मंगलबार राति भएको खेलको पहिलो मिनेटमा नै अल्भेरो मोराटाको गोलमा एट्लेटिकोले खेलमा अग्रता लिएको थियो । सेल्टाका इगो आसपासको मिस पासमा एन्जल कोरेराले क्रसमा दिएको पासलाई मोराटाले ५ यार्डबाट सहजै गोल गरेका थिए ।

शुरुमै पछि परेपछि घरेलु टोली सेल्टाले केही अवसर सिर्जना गरेपनि गोलको लागि दोस्रो हाफ नै कुर्नुपरेको थियो । ४९औं मिनेटमा ब्रेइस मेन्डिजको पासमा फ्रान बेल्ट्रानले बराबरी गोल फर्काए । ५८औं मिनेटमा मेन्डिजको पावरफुल सट एट्लेटिकोका गोलरक्षक जान ओब्लाकले मुस्किलले नियन्त्रणमा लिए ।  ६६औं मिनेटमा ओब्लाकले अर्काे उत्कृष्ट बचाउ गरे ।

८७औं मिनेटमा एट्लेटिकोका थोमस लेमारले प्रयास गरेपनि सेल्टाका गोलरक्षक रुवेन ब्लान्कोले नियन्त्रणमा लिए । ८८औं मिनेटमा एट्लेटिकोले पेनाल्टीको अपिल गरेपनि भिएआरबाट मान्यता पाएन । लगत्तै सान्टियागो एरिएसको क्रसलाई लुकास ओलाजाले ब्लक गर्दै खेललाई बराबरीमा राख्न सफल भए । बराबरीसँगै एट्लेटिको ३५ खेलबाट ६३ अंक जोडेर तेस्रो स्थानमा यथावत रहँदा सेल्टा ३६ अंक जोडेर १५औं स्थानमा छ ।

यस्तै अर्काे खेलमा भ्यालेन्सियाले रियल भालाडोलिडमाथि २–१ को जित निकाल्दै आठौं स्थानमा उक्लन सफल भएको छ । पराजित भालाडोलिड ३९ अंक जोडेर १३औं स्थानमा छ ।