एजेन्सी – क्याटलान शहरी प्रतिद्धन्द्धीलाई पराजित गर्दै बार्सिलोनाले शीर्षस्थानको रियल म्याड्रिडसँगको अंक दुरी १ मा छोट्याउदै उपाधि यात्रालाई जीवितै राख्दा एस्पान्योल रेलिगेसनमा परेको छ ।

घरेलु मैदानमा बुधबार राति भएको खेलमा बार्सिलोनाले एस्पान्योलमाथि १–० को झिनो जित निकाल्दै शीर्षस्थानको म्याड्रिडसँगको अंक दुरी १ मा छोट्याउदै उपाधि यात्रालाई जीवितै राखेको हो । यद्दपि रियलले एक खेल कम खेलेको छ । बार्सिलोनासँगको हारसँगै एस्पान्योल २६ वर्षपछि दोस्रो डिभिजनमा घटुवा भएको छ ।

बार्सिलोनाको जितमा उरुग्लेली फरवार्ड लुइस सुआरेजले दोस्रो हाफमा गरेको गोल नै निर्णायक बनेको थियो । खेलमा दुवै टोलीले १० खेलाडीमा समेटिएर खेलको अन्त्य गरेको थियो । नोउ क्याम्पमा भएको खेलको पहिलो हाफमा गोलरहित बराबरीमा सकिएको थियो ।  खेलको ११औं मिनेटमा एस्पान्योलले अग्रता लिने सुन्दर अवसर खेर फालेको थियो । एड्रियन इमबार्बाको प्रयासलाई गोलरक्षक मार्क आन्द्रे टेर स्टेगनले बचाए ।

२७औं मिनेटमा एन्टोइन ग्रिजमनले ढिला गरी दिएको पासमा लुइस सुआरेजले गरेको प्रहार कालेरोलाई डिफ्लेक्ट हुदै बाहिरिएको थियो । ४४औं मिनेटमा डिडाक भिल्लाको क्रसमा क्लेमेन्ट लेङ्लेटले क्लियर गर्ने प्रयास गरेपनि आफ्नै पोस्टतर्फ पुग्दा स्टेगनले मुस्किलले बचाएका थिए । त्यसैमा पाएको अवसरमा भिलाको प्रहार पोस्टमा लाग्दै बाहिरिदा एस्पान्योल अग्रता लिनबाट चुक्यो ।

दोस्रो हाफको शुरुमै दुवै टोली १० खेलाडीमा समेटिएको थियो । अन्सु फाती मैदान छिरेको चौथो मिनेटमा नै रातो कार्ड खादै मैदानबाट बाहिरिएका थिए । फर्नान्डो क्यालेरोलाई फउल गरेपछि शुरुवातमा पँहेलो कार्ड दिएपनि भिएआरको सहायतामा रेफ्रीले कार्ड परिवर्तन गर्दै रातो कार्ड देखाएको थिए ।

त्यसको तीन मिनेट पछि नै एस्पान्योल पनि १० खेलाडीमा समेटियो । पानेल लोजानोले जेरार्ड पिकेलाई फउल गरेपछि रेफ्रीले पहँलो कार्ड देखाउदै मैदान बाहिर पठाएपछि दुवै टोली १० खेलाडीमा समेटिन पुगेको थियो ।  ५६औं मिनेटमा सुआरेजले गोल गर्दै बार्सिलोनालाई अग्रता दिलाए । एन्टोइन ग्रिजमनको पासमा कप्तान लियोनेल मेस्सीको प्रहारलाई एस्पान्योलका गोलरक्षक डिएगो लोपेजले बचाएपनि राम्ररी नियन्त्रणमा लिन नसकेको बललाई सुआरेजले जाली चुमाएका थिए ।

६९औं मिनेटमा सर्जी रोवर्टाेको क्रसमा कप्तान मेस्सीको प्रहारलाई डिएगो लोपेजले उत्कृष्ट बचाउ गर्दा बार्सिलोना अग्रता दोब्बर पार्नबाट चुक्यो । ९०औं मिनेटमा डि तोमसले बराबरी गर्ने अवसर खेर फाल्यो । उनले झन्डै ३० यार्डबाट गरेको प्रहारलाई बार्सिलोनाको गोलरक्षक मार्क आन्द्रे टेर स्टेगनले सहजै बचाए । इन्ज्युरी समयमा एस्पान्योलले पेनाल्टीको अपिल गरेपनि भिएआरबाट मान्यता पाएन ।

जितसँगै बार्सिलोनाको ३५ खेलबाट ७६ अंक पुगेको छ । एक खेल कम खेलेको रियल म्याड्रिको ७७ अंक छ । रेलिगेसनमा परेको एस्पान्योलको २४ अंक छ । ला लिगामा ३ खेल बाँकी रहँदा तीनै खेलमा जित हात पारेपनि एस्पान्योलले रेलिगेसनबाट बच्ने छैन ।

अन्य नतिजा

गेटाफेविरुद्ध भिल्लारियल (१–३)

रियल बेटिसविरुद्ध ओसासुना (३–०)