‘ए’ डिभिजन लिगमा उक्लने आशाका साथ मैदानमा उत्रेका न्यु रोड टिम (एन.आर.टि) र मध्यपुर युथ एसोसिएसनले ‘बि’ डिभिजन लिगको आफ्नो पहिलो खेलमा जित दर्ता गरेका छन्।
सशस्त्र प्रहरी बलको हल्चोक स्थित रंगशालामा भएको दिनको पहिलो खेलमा मध्यपुरले खुमल्टारलाई २-१ले पराजित गर्यो। खेलको दोश्रो मिनेटमानै अघि बढेको खुमलटार खेलको अधिकांश समय आक्रामक देखिएको थियो। तर, पानि पर्न थालेपछि लय गुमाउनाले मध्यपुर जित हासिल गर्न सफल रह्यो। मध्यपुरले दोश्रो हाफको अतिरिक्त समयको पहिलो र तेश्रो मिनेटमा गोल गर्दै विजय हासिल गरेको हो।
अर्को खेलमा भने एन.आर.टिले सामाजिक युवा क्लबलाई ६-१को भारी अन्तरले हरायो। ‘ए’ डिभिजन खेलेका खेलाडीको बाहुल्यता रहेको एन.आर.टिले खेलभर सामाजिकमाथि दवाब कायम राख्यो। उसका लागि बिश्वजित गुरुङ र रितेश मल्लले २-२ गोल गरे।
