काठमाडौं – नेपाली राष्ट्रिय लिग च्याम्पियन रुस्लान थ्री स्टारले एएफसी कपको अघिल्लो चरण पुग्नका लागि समूह चरणको अन्तिम खेलको नतिजा कुर्नुपर्ने भएको छ । थ्री स्टारले आफ्नो दोस्रो खेलमा मंगलबार कम्बोडियाको नागावल्र्ड क्लबसँग १–१ को बराबरी खेलेपछि छनोटका लागि अर्को खेलको नतिजा कुर्नु पर्ने भएको हो ।
यो बराबरीले मंगोलियाको घरेलु टोली इर्चिम एफसी भने प्रतियोगिताबाट बाहिरिएको छ । थ्री स्टार ४ अंक सहित शीर्षस्थानमा छ भने नागावल्र्डको १ अंक छ । इर्चिम अंकविहिन छ । पहिलो खेलमा थ्री स्टारले इर्चिमलाई २–० ले हराएको थियो । अब थ्री स्टार र नागागल्र्ड मध्ये एउटा टोली अघिल्लो चरण पुग्नेछ । नागावल्र्ड र इर्चिमले बराबरी खेले वा इर्चिम विजयी भएमा थ्री स्टार फाइनल चरणमा पुग्नेछ । मंगोलियाको उलानबटारस्थित एस्ट्रो टर्फमा भएको खेलको २८ औ मिनेटमा निम सोभान्नाराको गोलबाट नागावल्र्डले अग्रता लिएको थियो । खेलको अन्तिम समयमा थ्रीस्टारका मार्टिन्सले गोल फर्काउँदै हार जोगाएका थिए ।
एएफसी कपको छनोटमा ९ क्लबको सहभागिता छ । ३ समूहमा अलग अलग प्रतिस्पर्धापछि हरेक समूहका शीर्ष टोली अन्तिम चरणमा पुग्नेछन् ।
