एजेन्सी – जर्मन क्लब बायर लिभरकुसन र स्वीस एफसी बसेलले युरोपा लिगको प्रि–क्वारटफाइनलको दोस्रो लेगमा आफ्नो प्रतिद्धन्द्धीमाथि झिनो जित निकाल्दै क्वाटरफाइनलमा स्थान बनाएको छ ।

पहिलो लेगमा फराकिलो जित निकालेपनि लिभरकुसन र बसेलले दोस्रो लेगमा गोलको लागि निकै संघर्ष गर्नुपरेको थियो । बायर लिभरकुसनले स्कटिस क्लब रेन्जर्सलाई दोस्रो लेगमा १–० ले तथा समग्रमा ४–१ ले पराजित गर्दै अन्तिम आठको यात्रा तय गरेको हो । पहिलो लेगमा लिभरकुसनले ३–१ को फराकिलो जित निकालेको थियो ।

बे एरिना लिभरकुसन जर्मनीमा बिहीबार राति भएको खेलमा घरेलु टोलीको जितमा मोउसा डियावीले दोस्रो हाफमा गरेको गोल नै निर्णायक बन्यो । डियावीले ५१औं मिनेटमा चार्लेस एरानगुइजको चलाखीपुर्ण थ्रुबललाई नियन्त्रणमा लिदै गोल गर्न सफल भएको थियो । त्यसअघि १६औं मिनेटमा लिभरकुसनका काई हाभर्टजको प्रहार बारमा लागेर फर्कदा शुरुवातमा अग्रता लिनबाट चुकेको थियो ।

२३औं मिनेटमा काई पुनः चुके । ५४औं मिनेटमा केभिन भोलान्डको थ्रु बलमा काईको प्रयासलाई रेन्जर्सका गोलरक्षक एलान म्याकग्रिगरले बचाए । ७१औं मिनेटमा एरफिल्डको प्रहारलाई इडमन्डले गोललाइनबाट बचाएपछि रेन्जर्स बराबरीबाट चुक्यो । खेलको अन्तिम समयमा रेन्जर्सले केही राम्रो प्रयास गरेपनि सदुपयोग गर्न नसक्दा हार टार्न सकेन ।

अब लिभरकुसनले सेमिफाइनल प्रवेशका लागि इटालियन क्लब इन्टर मिलानको सामना गर्नेछ । इन्टरले यसअघि नै स्पेनिस क्लब गेटाफेलाई पराजित गर्दै क्वाटरफाइनलमा स्थान बनाइसकेको छ ।

अर्काे खेलमा स्वीस क्लब एफसी बसेलले जर्मन क्लब आइनट्राख्ट फ्रान्कफर्टलाई १–० ले तथा समग्रमा ४–० को जित निकाल्दै क्वाटरफाइनलमा पुग्न सफल भयो । बसेलको जितमा खेल सकिदा दुई मिनेट बाँकी रहँदा फावियन फेरीले गरेको गोल नै निर्णायक बन्यो ।

 

अब बसेलले सेमिफाइनल प्रवेशका लागि युक्रेनी क्लब साख्तर डोनेस्कको सामना गर्नेछ । साख्तरले जर्मन क्लब वल्फ्सवर्गलाई हराएर अन्तिम आठमा स्थान सुरक्षित गरिसकेको छ ।

क्वाटरफाइनल समिकरण

इन्टर मिलानविरुद्ध बायर लिभरकुसन

म्यानचेस्टर युनाइटेडविरुद्ध कोपेनहेगन

साख्तर डोनेस्कविरुद्ध एफसी बसेल

वल्भ्सविरुद्ध सेभिल्ला