एजेन्सी – स्पेनिस च्याम्पियन रियल म्याड्रिडका प्रशिक्षक जिनेदिन जिदानले म्यान्चेस्टर सिटीविरुद्ध हुने च्याम्पियन्स लिगको खेलका लागि ग्यारेथ बेलकै आग्रहमा उनलाई टोलीमा समावेश नगरिएको बताएका छन् ।

राउन्ड अफ १६ अन्तर्गत दोस्रो लेग खेलको पूर्वसन्ध्यामा पत्रकार सम्मेलनमा बोल्दै जिदानले बेल आफैंले खेल्न नचाहेको बताएका हुन् । ‘बेल र मेरो विषयमा धेरै टिका टिप्पणी हुँदै आएको छ । हामीबीच एक खेलाडी र प्रशिक्षकको रुपमा राम्रो सम्बन्ध रहेको छ । अहिलेको अवस्थामा भने उनले खेल्न चाहेनन्, भएको यहि हो । बाँकी हामीबीच जे भएपनि त्यसले खासै फरक पर्दैन ।’

जिदानले टोली खेलका लागि पूर्ण रुपमा तयार रहेको बताए । ‘हामी यो खेलको लागि नै तयारी गरिरहेका थियौं । यो दोस्रो लेग हो र पहिलो केग्मा के भयो हामीलाई थाहा छ । हाम्रो पूरा ध्यान यस खेलमा छ र यो खेल हाम्रो लागि अर्को फाइनल हो । हामी सकेसम्म राम्रो नतिजा ल्याउने प्रयास गर्नेछौं ।’

जिदानले हाजार्ड पछिल्लो समय चोटका कारण संघर्ष गरिरहे पनि लामो विश्रामका कारण पूर्ण रुपमा फिट भइसकेको बताए । उनले ब्राजिलियन डिफेन्डर मार्सेलो पनि चोटमुक्त भएर टोलीमा खेल्न आतुर रहेको जानकरी दिए । जिदानले सिटीविरुद्ध खेलमा रियल दाबेदार नरहेपनि टोलीको सम्भावना भने रहेको बताए ।

‘हामीलाई केहि घाटा पक्कै छ । तर भोली अर्को खेल हो । कुनैपनि खेल अन्तिम मिनेटसम्म पनि जीवित रहन्छ । हामीलाई मैदानमा के गर्नुपर्छ भन्ने थाहा छ । हामीले तयारी पनि त्यसैगरी गरेका छौं,’ जिदानले भने, ‘हाम्रो टोली सन्तुलित छ र सिटीलाई हराउन सक्षम पनि छ । हामीले अहिले अर्को चरणमा कसरि पुग्ने भन्ने सोच बुनिरहेका छौं ।’